30 წლის შემდეგ McLaren ბრუნდება | ბოლიდი, რომელმაც სენას ბრაზილიური ოცნება აუხდინა

შემთხვევით ხომ არ გახსოვთ 1991 წლის ბრაზილიის გრან-პრი? და Formula 1-ის ტრაგიკულად დაღუპული ლეგენდის, აირტონ სენას მიერ მოპოვებული გამარჯვება? თუ F1-ის ნამდვილი გულშემატკივარი ხართ, მაშინ ეს რბოლაც ძალიან კარგად უნდა გახსოვდეთ. იმ დროს სენა უკვე ორგზის მსოფლიო ჩემპიონი იყო და მშობლიურ ქვეყანაში სუპერვარსკვავის სტატუსიც დამსახურებული ჰქონდა. თუმცა ბრაზილიის გრან-პრიზე კვლავ პირველი გამარჯვებისთვის იბრძოდა. 

თავიდან სენას ბოლიდს, McLaren MP4/6-ს გადაცემათა კოლოფის პრობლემები შეექმნა. თუმცა ბრაზილიელმა როგორღაც მოახერხა 3.5-ლიტრიანი V12-ის დამორჩილება და ნანატრი გამარჯვებაც დაისაკუთრა.

ეს MP4/6 ამ მოდელის ერთ-ერთი პირველი ეგზემპლარია და მას სენა, ჟერარდ ბერგერთან ერთად, 1991 წლის თებერვალში, Estoril-ზე საცდელი რბოლებისთვის იყენებდა. რეალურად, ბრაზილიის გრან-პრი მისთვის ერთადერთი საჩემპიონო რბოლა აღმოჩნდა, რადგან ამ სეზონში სენასა და McLaren-ის გამარჯვების შემდეგ, ამ მოდელმაც ავტომწარმოებლის სათავო ოფისში გადაინაცვლა - თანაც 30 წლით.

აღსანიშნავია, რომ მოდელი შასით MP4/6-1 2020 წელს გაიყიდა. ადამიანი კი, რომელმაც ის შეიძინა ახლა მასთან გამოსამშვიდობებლად ემზადება. RM Sotheby's დახურულ აუქციონს 8-დან 11 დეკემბრამდე გამართავს. აუქციონის სახლის ვარაუდით, სენას ბოლიდის ღირებულება 9-დან 11.5 მილიონ ფუნტ სტერლინგამდე მიაღწევს - ეს დაახლოებით 13 მილიონი ევროს ეკვივალენტია.

სენას გამარჯვებულ ბოლიდს McLaren-ის ავთენტურობის სერტიფიკატი და „ყველა საჭირო მოწყობილობა“ მოჰყვება - მათ შორის გარე სტარტერი, დისტანციური მართვის პანელი, საწვავის დამტენი და ძრავის წინასწარი გამათბობელი. როგორც აუქციონის ვებგვერდზეა მითითებული, 2020 წელს გაყიდვამდე ავტომობილი „McLaren Heritage-ის მიერ ექსპლუატაციაში შევიდა და რბოლისთვის მზა მდგომარეობაშიც იყო“. გარდა ამისა, მანქანა გაყიდვამდეც ყველა აუცილებელ პროცედურას გაივლის და შემოწმდება.

ასე, რომ თუ გსურთ Formula 1-ის გამარჯვების გემო თქვენც გაიგოთ და თან წარმოუდგენელი V12 ძრავისა და მექანიკური გადაცემათა კოლოფის გემოც გაიგოთ, სჯობს თუ ფულის დაზოგვას დღეიდან დაიწყებთ.