Rivian-მა 2026 წლის პირველ კვარტალში ელექტრომობილების სეგმენტში სენსაცია დაატრიალა

აშშ-ის ელექტრომობილების ბაზარზე 2026 წლის პირველი კვარტლის შედეგებს სენსაცია შეგვიძლია ვუწოდოთ — ახალგაზრდა ამერიკულმა ბრენდმა, Rivian-მა გაყიდვებით ისეთ გიგანტებს გადაასწრო, როგორებიც Kia, Ford-ი, Toyota და BMW არიან.

კალიფორნიულმა ავტომწარმოებელმა იანვრიდან მარტის ჩათვლით 10 365 ელექტრომობილი გაყიდა. საინტერესოა, რომ ამავე პერიოდში კომპანიამ 10 236 ერთეული აწარმოა, რაც იმას ნიშნავს, რომ მოთხოვნის დასაკმაყოფილებლად მათ რეზერვების გამოყენებაც მოუწიათ.

ამ წარმატების ფონზე, Rivian-მა 2026 წლის გაყიდვების პროგნოზი 67 000 ერთეულამდე გაზარდა. ინდუსტრია ახლა მოუთმენლად ელოდება უფრო ხელმისაწვდომ R2 მოდელს, რომელიც გაზაფხულის ბოლოს გამოვა და Tesla Model Y-ის მთავარ კონკურენტად მოიაზრება.

Rivian-ის შედეგები კიდევ უფრო შთამბეჭდავი ჩანს სხვა ბრენდების ფონზე: Toyota-მ პირველ კვარტალში 10 029 ელექტრომობილი გაყიდა, რაც 79%-იანი ზრდაა გასულ წელთან შედარებით, თუმცა Rivian-ს მაინც მცირედით ჩამორჩება. რაც შეეხება BMW-ს, გერმანელებმა აშშ-ში 9 856 ელექტრომობილი და დამუხტვადი ჰიბრიდი გაყიდეს, რაც გასულ წელთან შედარებით 50%-იანი ვარდნაა.

წელი მძიმედ დაიწყო Ford-ისთვის — ელექტრომობილების გაყიდვები 70%-ით დაეცა და მხოლოდ 6 860 ერთეული შეადგინა (მათ შორის 4 600 Mustang Mach-E და 2 060 F-150 Lightning). კორეულმა Kia-მ ჯამში 4 763 ელექტრომობილი გაყიდა. აღსანიშნავია, რომ Kia-მ რეკორდი ჰიბრიდების გაყიდვებში მოხსნა, სადაც 73%-იანი ზრდა დააფიქსირა.

რა გველოდება წინ?

მიუხედავად იმისა, რომ Rivian ამ ეტაპზე ლიდერობს, ბრძოლა წლის ბოლოსკენ გამწვავდება. ბაზარზე გამოდიან ისეთი მნიშვნელოვანი მოდელები, როგორიცაა Kia EV3 და BMW iX3, რომლებიც ძალთა ბალანსის შეცვლას ეცდებიან. 

ჯერჯერობით კი ფაქტი ერთია: Rivian-მა დაამტკიცა, რომ მას შეუძლია არა მხოლოდ კონკურენცია გაუწიოს ინდუსტრიის მოსტრებს, არამედ დაამარცხოს კიდეც ისინი საკუთარ მოედანზე.