როგორი მანქანები მოსწონდა ლეგენდარულ ჩაკ ნორისს?

ლეგენდარული ჩაკ ნორისი არასდროს ყოფილა იმ ტიპის ვარსკვლავი, რომელიც აუქციონებზე იშვიათი ჰიპერქარების ყიდვით იწონებდა თავს. მისი ავტო-ფილოსოფია ყოველთვის სიმარტივესა და ფუნქციურობას ეფუძნებოდა... მიუხედავად ამისა, მაინც არსებობს ერთი ავტომობილი, რომელიც მცირე ხნის წინ გარდაცვლილ ლეგენდარულ მსახიობს ძალიან უყვარდა — ეს 1970-იანი წლების დასაწყისის Dodge Challenger-ია — ამერიკული „მასკლ-ქარების“ ეპოქის მწვერვალი, რომელშიც მნიშვნელობა არა ელექტრონიკას, არამედ V8 ძრავის დიდ მოცულობასა და ჭეშმარიტ სიმძლავრეს ენიჭებოდა. იქნბოდა აღჭურვილი 440 Magnum-ით თუ ლეგენდარული 426 HEMI-ით, Challenger-ი ყოველთვის პირდაპირი და ცხოველური ძალის სიმბოლო გახლდათ.

საინტერესოა, რომ მაყურებლის მეხსიერებაში ჩაკ ნორისი მაინც სხვა ტიპის ტრანსპორტთან ასოცირდება. სერიალში „უოკერი, ტეხასელი რეინჯერი“ მას ეკრანებზე თავის განუყრელ პიკაპ Dodge Ram-თან ერთად ვხედავდით, რომელიც გამძლეობისა და პრაქტიკულობის განსახიერებაა. მანამდე კი, ფილმში „მარტოხელა მგელი მაქკუეიდი“, ნორისმა სახელი Dodge Ramcharger-ის მართვით გაითქვა. ეს ავტომობილები მხოლოდ გადაადგილების საშუალება კი არა, მისი პერსონაჟების იდენტობის ნაწილი იყო — მტკიცე, უტეხი და უბრალო.

ნორისის კავშირი ავტოსამყაროსთან მხოლოდ ფილმებით არ შემოიფარგლება. მისი ვაჟი, ერიკ ნორისი, NASCAR-ის პიკაპების სერიაში ასპარეზობდა, სანამ ჰოლივუდის წამყვანი ტრიუკების კოორდინატორი გახდებოდა. თავად ჩაკიც ხშირად ერთვებოდა ავტო-კულტურის გასართობ პროექტებში — მაგალითად, Diesel Brothers-მა მის პატივსაცემად შექმნა მონსტრი-სატვირთო Truck Norris-ი, რომელიც Chevy Silverado-ს ბაზაზეა აგებული და ამერიკული დროშის სიმბოლიკითაა გაფორმებული.

პირად ცხოვრებაში ჩაკ ნორისი სიკვდილამდე ისეთ ავტომობილებს ანიჭებდა უპირატესობას, რომლებიც დროს უძლებდნენ. მის გარაჟში შეხვდებით სრულგაბარიტიან პიკაპებს, როგორებიცაა Ford F-150 და Dodge Ram-ი, ასევე, ლეგენდარული Toyota Land Cruiser-ი. ეს არჩევანი კიდევ ერთხელ უსვამს ხაზს მსახიობის ხასიათს — ის ირჩევდა არა სტატუსს, არამედ რეალურ შესაძლებლობებსა და კუნთებს. ჩაკ ნორისისთვის ავტომობილს ისევე უნდა ემუშავა, როგორც მის მუშტებს — ზუსტად, მძლავრად და ეფექტიანად.