ფრანკენშტეინის მონსტრი — ამერიკელმა კაცმა X5-ში ძველი Ford-ის ძრავა ჩადგა

ძრავის შეცვლა ყოველთვის საინტერესოა, თუმცა პროექტები, რომლებიც სრულ საინჟინრო აბსურდსა და გენიალურობას შორის ბალანსირებენ, განსაკუთრებულ ყურადღებას იმსახურებენ. სწორედ ასეთი შემთხვევა გავრცელდა Facebook-ის საავტომობილო ჯგუფებში, როდესაც ერთ-ერთმა ენტუზიასტმა მწყობრიდან გამოსული BMW X5-ის გერმანული V8 ძრავა ძველი, ამერიკული Ford-ის 3.9-ლიტრიანი, 6-ცილინდრიანი ერთრიგა აგრეგატითა და 3-სიჩქარიანი FMX ავტომატური გადაცემათა კოლოფით ჩაანაცვლა.

ასევე იხილეთ: 7 ყველაზე ცუდი მანქანა, რაც „ბიემვის" ოდესმე შეუქმნია

ყველაფერი მას შემდეგ დაიწყო, რაც X5-ის ქარხნულ V8 ძრავას სერიოზული პრობლემა აღმოაჩნდა, რომლის შეკეთებაც ოფიციალურ სერვისცენტრში დაახლოებით 5 200 დოლარი ჯდებოდა. ასეთი ხარჯი მეორადი SUV-ის მფლობელისთვის ხშირად ნიშნავს იმას, რომ მანქანა ან იაფფასიან აუქციონზე უნდა გაიყიდოს, ან ნაწილებად დაიშალოს. გერმანული V8-ის აღდგენის ან ახლით ჩანაცვლების ნაცვლად, პროექტის ავტორმა სრულიად სხვა, ბიუჯეტური გზა აირჩია.

Ford-ის ძველი 6-ცილინდრიანი ერთრიგა ძრავა ამ სიტუაციაში საინტერესო კონტრარგუმენტი აღმოჩნდა: ის მექანიკურად ძალიან მარტივია, სათადარიგო ნაწილები იაფი და ხელმისაწვდომია, ხოლო ელექტრონიკის თითქმის სრული არქონა პროცესს ბევრად აადვილებს. ამას დაემატა 3-სიჩქარიანი კოლოფიც, რომლის დიაგნოსტიკა და შეკეთება ჩვეულებრივი, კლასიკური ხელსაწყოებით არის შესაძლებელი.

მსგავსმა ექსტრემალურმა ნაბიჯმა საავტომობილო ჯგუფი ორ ბანაკად გაყო. ერთნი აღფრთოვანებულნი არიან ინჟინრული კრეატიულობით, ფინანსური სარგებლითა და იმ ფაქტით, რომ თანამედროვე, კომპლექსური ავტომობილი მხოლოდ „დახურულ ეკოსისტემად“ არ იქნა აღქმული. მეორე მხარე კი ეჭვქვეშ აყენებს მის გამძლეობას და სვამს ლოგიკურ კითხვას: რამდენად შეძლებს ძველი ეპოქის აგრეგატი თანამედროვე, მძიმე გერმანული ქროსოვერის შასის ეფექტურად და უპრობლემოდ ტარებას ხანგრძლივ პერსპექტივაში?

და თქვენ რას იტყვით?