აშშ-ში Mitsubishi-ს მოდელი გაცოცხლდა | Outlander Sport-ის გაყიდვები რეკორდულია
ყველაზე მოთხოვნადი ავტომობილი ამერიკის ბაზარზე ამჟამად შესაძლოა ყველაზე ძველიც კი იყოს. Mitsubishi Outlander Sport-ი ოდნავ დაგვიანებულ ტრიუმფს განიცდის. 2026 წლის პირველ ნახევარში Mitsubishi-ს მოდელმა იმაზე მეტი ეგზემპლარი გაყიდა, ვიდრე 2021 წლის შემდეგ ნებისმიერ სრულ წელიწადში. თუ გავითვალისწინებთ, რომ მისი კონსტრუქცია გაცილებით ძველია, აშკარაა, რომ Mitsubishi-მ ამ „ბებერ ძაღლს“ ახალი ილეთები ასწავლა.
ასევე იხილეთ: ტყუილი, რომელმაც Mitsubishi-ის დინასტია გაანადგურა
2026 წლის განვლილ პერიოდში ახალი მფლობელი 20 508 ერთეულმა Mitsubishi Outlander Sport-მა იპოვა. შედარებისთვის, 2025 წლის პირველ ნახევარში კომპანიამ 11 878 მანქანა გაყიდა, ხოლო მთელი გასული წლის განმავლობაში – სულ 20 479. ეს არ ყოფილა ერთწლიანი ჩავარდნა: მოდელის გაყიდვები 2024 წელს 15 124 ერთეულს შეადგენდა, 2023-ში – 15 016-ს, ხოლო 2022 წელს – 16 374-ს. 2026 წლის პირველ ნახევარში Outlander Sport-ის გაყიდვები შარშანდელთან შედარებით 73%-ითაა გაზრდილი, ხოლო 2024 წლის ანალოგიურ პერიოდთან შედარებით თითქმის გასამმაგდა.
რა ხდება? Mitsubishi ამას „მომხმარებლისთვის ფინანსური ხელმისაწვდომობის პრობლემის მოგვარებაზე მკაცრ ფოკუსს“ უწოდებს. სხვა სიტყვებით რომ ვთქვათ, მანქანა იაფია იმ ეპოქაში, როცა ყველასთვის ხელმისაწვდომობა გახდა პრიორიტეტი. Outlander Sport-ი ერთ-ერთია იმ მცირერიცხოვან ქროსოვერებს შორის, რომელთა საწყისი ფასი 25 000 დოლარზე ნაკლებია – ის 24 995 დოლარი ღირს. ამასთანავე, სრული ამძრაობა საბაზისო აღჭურვილობაშივე შედის, რაც მას დღეს ბაზარზე არსებულ ყველაზე იაფ სტანდარტულ AWD მოდელად აქცევს.
ამერიკულ გზებზე Dodge Durango შესაძლოა ყველაზე ძველ SUV-ად ითვლებოდეს, თუმცა Outlander Sport-იც 2012 წლის შემდეგ ბაზარზე ახალი თაობის გარეშე მოღვაწეობს. წლების განმავლობაში მოდელმა რამდენიმე რესტაილინგი გაიარა, მათ შორის კოსმეტიკური განახლება 2014 წელს და სალონისა თუ ტექნოლოგიების მოდერნიზება 2019 წელს. აღსანიშნავია, რომ ევროპაში ამ მოდელის ახალი თაობა კი იყიდება, თუმცა ის რეალურად გადაცმული Renault Captur-ია და ამერიკაში მისი იმპორტი არ იგეგმება.
მაშველი რგოლი Mitsubishi-სთვის
როგორც ჩანს, ამერიკაში ახალი მანქანების გაძვირების კრიზისი Mitsubishi-სთვის ზუსტად საჭირო დროს დაიწყო. ბაზრიდან მართლაც იაფი მანქანების გაქრობამ Outlander Sport-ს მეორე სუნთქვა გაუხსნა. იაპონური ბრენდი ხშირად ხვდებოდა იმ კომპანიების სიებში, რომლებიც შესაძლოა 2030 წლამდე საერთოდ გაქრნენ ამერიკიდან, თუმცა ეს 16 წლის ქროსოვერი ბრენდს ამოსუნთქვის საშუალებასა და მომავლის იმედს აძლევს.
ბევრ ავტომოყვარულს სურს, რომ Mitsubishi კვლავ დაუბრუნდეს საინტერესო და ლეგენდარული მანქანების წარმოებას, თუმცა ამ ეტაპზე კომპანიის მთავარი მიზანი გადარჩენაა. ხელმისაწვდომი, სრულამძრავიანი და პრაქტიკული ყოველდღიური მანქანები ბრენდის ახალ სავიზიტო ბარათად იქცა და თუ ეს სტრატეგია მათ ბაზარზე პოზიციებს გაუმყარებს, შესაძლოა კომპანიამ სამომავლოდ უფრო ამაღელვებელი მოდელების შექმნაზეც იფიქროს.
