თქვენც გძულთ Ferrari Luce? | ჯეფ ბეზოსს დააბრალეთ

Ferrari-ს პირველი ელექტრომობილი, Luce, გამოჩენის დღიდანვე კრიტიკის ქარ-ცეცხლში იქნა გახვეული. მოდელს ძირითადად მაინც ვიზუალს უწუნებდნენ და ბევრიც ამბობდა, რომ ამ დიზაინის EV იტალიური ავტომწარმოებლის სხვა მოდელებს და ხასიათს საერთოდაც არ უხდებოდა.

ასევე დაგაინტერესებთ: რამდენად უსაფრთხოა ელექტრო ავტომობილები?

ახლა კი ცნობილი ხდება, რომ Luce-ს შექმნის გადაწყვეტილებაზე გარკვეული გავლენა Amazon-ის დამფუძნებელმა, ამერიკელმა მილიარდერმა ჯეფ ბეზოსმაც იქონია. Ferrari-ს თავმჯდომარემ, ჯონ ელკანმა, კონფერენციაზე განაცხადა, რომ 2016 წელს ბეზოსმა დაარწმუნა, რომ Ferrari ელექტრომობილების შექმნაზე სერიოზულად უნდა დაფიქრებულიყო.

„მანქანების შესახებ არაფერი ვიცი, თუმცა ინოვაციების გამეგება. ვფიქრობ, ელექტრომობილებზე სერიოზულად უნდა დაფიქრდეთ“, — უთხრა ბეზოსმა ელკანს დაახლოებით 10 წლის წინ.

ელკანის თქმით, ამ საუბარმა Ferrari-ს ელექტრომობილების მიმართულებით რწმენა კიდევ უფრო გაუმყარა.

თუმცა სამართლიანობისთვის ისიც უნდა ითქვას, რომ წარსულში Ferrari-ს სხვა მოდელებსაც გამოუწვევიათ არაერთგვაროვანი რეაქცია. მაგალითად, ასეთი იყო 1974 წლის Dino 308 GT4, რომლის კუთხოვანი დიზაინი Ferrari-ს იმ პერიოდისთვის დამახასიათებელი სტილისგან მნიშვნელოვნად განსხვავდებოდა, 2012 წელს კი FF-ის shooting brake-ის ტიპის ძარამ დაიმსახურა კრიტიკა.

თუმცა Luce-ს შემთხვევაში მთავარი ცვლილება მხოლოდ დიზაინი არ არის. Ferrari-სთვის ელექტრომობილის შექმნა თავადაც საკმაოდ რადიკალური ნაბიჯია, განსაკუთრებით იმის გათვალისწინებით, რომ ბრენდის იდენტობა ათწლეულების განმავლობაში შიგაწვის ძრავებთან, განსაკუთრებით კი V8 და V12 აგრეგატებთან იყო დაკავშირებული.