„მისი სისწრაფე ცოტა მაშინებს“ | ლანდო ნორისი McLaren W1-ით აღფრთოვანებულია

Formula 1-ის ჩემპიონი, ლანდო ნორისი, McLaren-ის უახლესი სუპერქარის, W1-ის შესაძლებლობებს ახლა უკვე აეროდრომზე გაეცნო. 1 275 ცხენის ძალის მქონე ჰიბრიდულმა ავტომობილმა ბრიტანელი პილოტი იმდენად გააოცა, აღიარა კიდეც, რომ მისმა სისწრაფემ ცოტა არ იყოს შეაშინა.

ნორისი McLaren-ის გუნდთან თანამშრომლობას არა მხოლოდ ფორმულა 1-ში, არამედ ლე მანისთვის განკუთვნილი ახალი ჰიპერქარის შემუშავებაშიც მონაწილეობს. ახლა კი მან კომპანიის საგზაო სუპერქარის, W1-ის, გამოცდის შესაძლებლობაც მიიღო.

სიმბოლურია, რომ ნორისმა, რომელმაც 17-წლიანი პაუზის შემდეგ McLaren-ს F1-ის ჩემპიონის ტიტული დაუბრუნა, ავტომობილი იმავე „პორტიმაუს“ ტრასაზე გამოსცადა, სადაც ბრიტანული გუნდის ლე მანის ჰიპერქარიც გამოცადა.

McLaren W1 ჰიბრიდული სუპერქარია — 1 275 ცხენის ძალითა და 350 კმ/სთ-ის მაქსიმალური სიჩქარით. მოდელის ფასი 2 მილიონ გირვანქა სტერლინგს აღწევს. ავტომობილის წარმოება 399 ეგზემპლარით შემოიფარგლება და ყველა მათგანი უკვე გაყიდულია. ხოლო ორი ეგზემპლარი თავად McLaren-ის პილოტებისთვის, ლანდო ნორისისა და ოსკარ პიასტრისთვისაა განკუთვნილი.

ტრასაზე გამოჩენისთანავე ნორისმა გადაცემათა კოლოფის მექანიკური რეჟიმი აირჩია, რათა ავტომობილის მართვაზე სრული კონტროლი ჰქონოდა. ბრიტანელი მრბოლელი განსაკუთრებით სუპერქარის ორმა მახასიათებელმა — მოსახვევებში მოჭიდებამ და სისწრაფემ — გააოცა. „მოსახვევებში გაცილებით უკეთესი მოჭიდება აქვს, ვიდრე ველოდი“, — აღნიშნა ნორისმა.

W1-ის ჰიბრიდული სისტემა 4-ლიტრიან, ტვინტურბო V8 ბენზინის ძრავსა და ელექტროძრავას აერთიანებს. შიგაწვის ძრავის სიმძლავრე 915 ცხენის ძალაა, ელექტროძრავისა კი — 342 ცხენის ძალა. ელექტროაგრეგატის მეშვეობით სიმძლავრე მხოლოდ უკანა ბორბლებს გადაეცემა.

პორტიმაუს ტრასაზე გამოცდის შემდეგ ნორისმა შთაბეჭდილებები არ დამალა. McLaren-ის პილოტის თქმით, ამ ავტომობილის მართვა ფიზიკურ მომზადებასაც კი მოითხოვს. „სხეული მტკივა, საჭეს ძლიერად უნდა მოეჭიდო. იმედი მაქვს, რომ ხალხი ამისთვის მზადაა“, — განაცხადა ნორისმა.

ნორისის თქმით, W1-ის სისწრაფე იმდენად შთამბეჭდავია, რომ მის სამართავად მძღოლებს შესაძლოა სპეციალური მომზადებაც დასჭირდეთ. „მისი სისწრაფე ცოტათი მაშინებდა. ვფიქრობ, ამ მოდელის სამართავად მართვის მოწმობის სპეციალური კატეგორია უნდა არსებობდეს — რაღაც სუპერქარებისთვის განკუთვნილი“, — იხუმრა ნორისმა.

მიუხედავად ამ მცირედი შიშისა, ნორისი ავტომობილით იმდენად აღფრთოვანებული დარჩა, რომ აღიარა, საკუთარ ეგზემპლარსაც მოუთმენლად ელოდება. მისი W1 კი ბრიტანელის ავტოფარეხში, სავარაუდოდ, უახლოეს მომავალში დაიდებს ბინას.