ავტოსამრეცხაოზე Ford F-150 Lightning-ი 7 მანქანას დაეჯახა
მანქანის მოვლისთვის საჭირო ხარჯების შესამცირებლად ბევრი მძღოლი სამრეცხაოში ხშირ ვიზიტს თავს არიდებს. ბოლო ვიზიტი კი, Ford-ის პიკაპის მძღოლის წყალობით, დამატებით შვიდი ავტომობილის მფლობელსაც იმაზე უფრო ძვირი დაუჯდა, ვიდრე გათვლილი ჰქონდათ.
შემთხვევა მიჩიგანში, Diamond Carwash and Detail-ში მოხდა. Ford F-150 Lightning-ის მძღოლმა მოულოდნელად კონტროლი დაკარგა, ჯერ სამრეცხაოს რიგში მდგარ Toyota Sienna-ს დაეჯახა, შემდეგ კი, ლანდშაფტზე გადავარდა და იქვე გაჩერებულ Honda Accord-საც შეასკდა. დარტყმა იმდენად ძლიერი იყო, რომ Honda-მ მის გვერდით მდგომი ავტომობილიც დააზიანა.
რაც შეეხება Toyota Sienna-ს, როგორც უსაფრთხოების კამერიდანაც კარგად ჩანს, Ford-ის მძღოლი მას და სამრეცხაოს ნიშანს თითქმის ერთდროულად ეჯახება. მანქანა ავტოსამრეცხაოს რიგში იმყოფებოდა, რა დროსაც უკნიდან Ford-ის პიკაპი არტყამს. ინერციით, Toyota წინ მდგომ ავტომობილს შეეჯახა და შხაპის მომლოდინეთა რიგებში მყოფი კიდევ ხუთი ავტომობილიც „დომინოს პრინციპს“ დაემორჩილა. ავარიის შედეგად დაზიანებულ ავტომობილებს შორისაა Ford Taurus-ი, Dodge Charger-ი და Ford Explorer-ი. როგორი ამერიკული სიაა, არა?
ამ ეტაპზე გაურკვეველია, თუ რამ გამოიწვია Ford-ის წინა მიმართულებით აჩქარება. ელექტრო სატრანსპორტო საშუალებებს, როგორ წესი, ძალიან კარგი აჩქარება აქვს. შესაბამისად შეიძლება ვივარაუდოთ, რომ მძღოლს ერთმანეთში აქსელერატორისა და მუხრუჭის სატერფულები აერია, უნებლიედ დაიძრა და დაუდევრობით, შვიდი ავტომობილიც შეიწირა.