Chevy Malibu-ს მძღოლი 225 კმ/სთ-მდე აჩქარდა და აღმოაჩინა, რომ ფიზიკა არსებობს
აშშ-ში, გასულ თვეში მომხდარი ერთი ჩვეულებრივი საგზაო შემოწმება ნამდვილ კოშმარად იქცა Chevy-ს მძღოლისთვის, რომელმაც რამდენიმე საბედისწერო შეცდომა დაუშვა. Chevrolet Malibu-ს მძღოლი პოლიციის მოთხოვნას არ დაემორჩილა და გაჩერების ნაცვლად 225 კმ/სთ-მდე აჩქარდა. ამას მძიმე ავარია მოჰყვა, თუმცა, საბედნიეროდ, მრავალი დევნისგან განსხვავებით, ეს შემთხვევა ფატალურად არ დასრულებულა.
ინციდენტი 24 აპრილს მოხდა, როდესაც პატრულმა Malibu შენიშნა, რომელიც სამშენებლო ზონაში, სადაც სიჩქარე 45 მილით (72კმ/სთ) იყო შეზღუდული, თითქმის 80 მილით (130 კმ/სთ) მიქროდა. პოლიციელმა ციმციმები მაშინვე ჩართო და დევნა დაიწყო. იმ დროს, როდესაც პატრული ავტომობილს წამოეწია, Chevy უკვე 170 კმ/სთ-ით მოძრაობდა.
გაჩერების ნაცვლად, მძღოლმა გაქცევა გადაწყვიტა. სიჩქარემ 225 კმ/სთ-ს მიაღწია, რაც მანევრისთვის არანაირ შანსს არ ტოვებდა. მარჯვენა მოსახვევში შესვლისას მძღოლმა კონტროლი დაკარგა, მანქანა ჯერ მარცხენა მხარეს გადავიდა, შემდეგ კი მკვეთრი მანევრის გამო გზის დამცავ ბარიერს შეეჯახა.
დარტყმა იმდენად ძლიერი იყო, რომ მალიბუ რამდენჯერმე გადაბრუნდა, ხოლო მისი ნაწილები ჰაერში მიმოიფანტა. საინტერესოა, რომ როდესაც მტვერი გაიფანტა, ამოყირავებული მანქანიდან ჯერ კიდევ ხმამაღალი მუსიკა ისმოდა. მძღოლი, კრისტა ბანჩი, მანქანაში ჩაიკეტა და მისი ამოყვანა მაშველებმა მხოლოდ სპეციალური ტექნიკით შეძლეს. როგორც აღინიშნა, ის გადარჩა და საავადმყოფოდან პირდაპირ საპატიმროში გადაიყვანეს. მოგვიანებით მან აღიარა, რომ პოლიციის დანახვაზე „შეშინდა“ და პირადი მიზეზის გამო ჩქარობდა.
ახლა მძღოლს გაცილებით სერიოზული პრობლემები აქვს — ბრალდების გრძელი სია, რომელიც მოიცავს გაქცევას, სიჩქარის გადაჭარბებას, სახიფათო მართვასა და ქონების დაზიანებას. ეს შემთხვევა კიდევ ერთი დრამატული შეხსენებაა იმისა, რომ რაც უნდა სწრაფად იარო, ფიზიკის კანონებს ვერ გაექცევი.
