ევროპის ბაზარზე ელექტრომობილების წილი რეკორდულ ნიშნულზეა

გასულ თვეში, ევროპის საავტომობილო ბაზარზე ელექტრომობილების პოპულარობა კიდევ უფრო გაიზარდა. თვის განმავლობაში, სრულად ელექტრო ავტომობილებმა (BEV) ევროპაში ახალი ავტომობილების საერთო გაყიდვების 25.7% შეადგინა და ახალი ისტორიული მაქსიმუმიც დააფიქსირა. ეს კი ნიშნავს, რომ 2026 წლის ივლისში, ევროპაში გაყიდული ყოველი ოთხი ახალი ავტომობილიდან ერთზე მეტი სრულად ელექტრო იყო.

ასევე იხილეთ: რამდენად უსაფრთხოა ელექტრო ავტომობილები?

E-Mobility Europe-ის, New Automotive-ისა და Fier Automotive-ის უახლესი მონაცემებით, ევროპის 16 ძირითად ბაზარზე ივლისში ჯამში სულ 224 266 ერთეული სრულად ელექტრო ავტომობილი დარეგისტრირდა. ეს მაჩვენებელი გასული წლის ანალოგიურ პერიოდთან შედარებით 13.6%-ითაა გაზრდილი.

წლის დასაწყისიდან დღემდე, ევროპის ბაზარზე თითქმის 1.5 მილიონი BEV დარეგისტრირდა, რაც 2025 წლის იმავე პერიოდთან შედარებით 30%-იანი მატებაა და ევროპელი მომხმარებლების მხრიდან ელექტრომობილებზე გადასვლის ტენდენციის გაგრძელებაზე მიუთითებს.

კონკრეტული ქვეყნების შემთხვევაში, ერთ-ერთი ყველაზე ძლიერი შედეგი საფრანგეთმა აჩვენა. აქ სრულად ელექტრო ავტომობილების წილმა ბაზარზე 35% შეადგინა. კერძოდ, საფრანგეთში ივლისის თვეში 44 378 ერთეული ავტომობილი დარეგისტრირდა. გერმანიაში კი BEV-ების საბაზრო წილი 29.3%-მდე გაიზარდა, ხოლო რეგისტრაციების რაოდენობამ 78 609 ერთეული შეადგინა.

ასევე დაგაინტერესებთ: ელექტრომობილების საიმედოობის რეიტინგი | Tesla ევროპელებმა დაჯაბნეს

ევროპის ყველაზე ელექტრიფიცირებულ ბაზრებად კვლავ სკანდინავიისა და ბენილუქსის ქვეყნები რჩებიან. რეგიონის ლიდერი დანიაა, აქ სრულად ელექტრო ავტომობილების წილი 80.1%-ს აღწევს. მას მოჰყვებიან ფინეთი — 52.6%-ით, ნიდერლანდები — 47.3%-ით, ბელგია — 42.8%-ით და შვედეთი — 42.6%-ით.

E-Mobility Europe-ის გენერალური მდივნის, კრის ჰერონის, განცხადებით, ელექტრო ავტომობილები 2026 წელს კვლავ ევროპის ერთ-ერთ ყველაზე წარმატებულ მიმართულებად რჩება. ამ ზრდის შესანარჩუნებლად კი აუცილებელია, ქვეყნებმა სტაბილური და პროგნოზირებადი პოლიტიკა უზრუნველყონ.

თუმცა, ყველა ევროპულ ბაზარზე ერთნაირი ზრდა არ დაფიქსირებულა. მაგალითად, იტალიაში BEV-ების წილი ივლისში 5.9%-მდე შემცირდა, მაშინ როდესაც ივნისში 10.1% იყო. კლება იტალიაში ელექტრომობილების საბაზრო წილის კლებას წახალისების პროგრამების დასრულებას უკავშირდება. ყველაზე ნაკლებად ელექტრიფიცირებულ ბაზრებს შორის ასევე დარჩნენ პოლონეთი და ჩეხეთი. ამ ქვეყნებში სრულად ელექტრო ავტომობილების საბაზრო წილი, შესაბამისად, 4% და 7.5%-ს შეადგენს.