საუკეთესო ელექტრო SUV-ები 2026 წლისთვის | Edmunds-ის კვლევა

რეგულაციების გამკაცრებასთან ერთად, ავტომწარმოებლები ელექტრიფიკაციის გეგმებზე მუშაობენ და ბაზარზე ყოველწლიურად ახალი მოდელებიც გამოაქვთ. მიუხედავად იმისა, რომ ბოლო პერიოდში, მათ შორის Tesla-სა და BYD-ის მოდელებზეც კი, მოთხოვნა მცირედით შემცირებულია, EV-ების გაყიდვების მზარდი ტენდენცია უახლოეს მომავალში, წესით, კვლავ აღდგება.

ამ თემასთან დაკავშირებით, Edmunds-მა რამდენიმე სეგმენტისთვის საუკეთესო ელექტრო SUV-ები წარმოადგინა. ანალიტიკურმა ფირმამ მოდელები 10-ბალიანი სისტემით შეაფასა და თითოეული კატეგორიისთვის საუკეთესო SUV გამოავლინა. სია მოიცავს ელექტრო SUV-ებს სხვადასხვა ზომისა და საუკეთესო წარმადობის მიხედვით.

Hyundai Ioniq 5 - საუკეთესო პატარა ზომის ელექტრო SUV

Edmunds-ის შეფასებით, პატარა ზომის ელექტრო SUV-ის შეძენისას საუკეთესო არჩევანი Hyundai Ioniq 5 იქნება. ბატარეის სიმძლავრის (63 კვტ/სთ და 84 კვტ/სთ) გათვალისწინებით, ეს მოდელი 350-დან 515 კილომეტრამდე დაფარვის დიაპაზონს გვთავაზობს. 800-ვოლტიანი სისტემის დახმარებით კი, 10%-დან 80%-მდე ეს მოდელი — რა თქმა უნდა, შესაბამისი ადაპტერის გამოყენების შემთხვევაში — სულ რაღაც 18 წუთში იმუხტება. Hyundai-სთან ერთად, ანალიტიკური ფირმა Tesla Model Y-საც უწევს რეკომენდაციას, რომელიც, მისი შეფასებით, ოჯახებისთვის ერთ-ერთი საუკეთესო არჩევანი იქნება.

Hyundai Ioniq 9 - საუკეთესო საშუალო ზომის ელექტრო SUV

საუკეთესო საშუალო ზომის ელექტრო SUV-ი კი, Edmunds-ის შეფასებით, 10-დან 8.4 ქულით, Ioniq 9 გახლავთ. თავის ანგარიშში ანალიტიკური ფირმა მოდელის 3-რიგიან განლაგებას, დიდი ზომის საბარგულსა და სწრაფი დამუხტვის შესაძლებლობას გამოყოფს. 2026 წლის მოდელი ერთი დამუხტვით 620 კილომეტრის დაფარვის დიაპაზონს უზრუნველყოფს და 10-დან 80%-მდე 24 წუთში იმუხტება. იმავე კატეგორიაში Edmunds-ი ასახელებს Kia EV9-საც, რომელმაც 8.2/10 შეფასება დაიმსახურა.

BMW iX xDrive45 - საუკეთესო საშუალო ზომის მდიდრული ელექტრო SUV

საშუალო ზომის მდიდრულ ელექტრო SUV-ებს შორის, Edmunds-ი არჩევანს BMW iX xDrive45-ზე აკეთებს. ანგარიშში ყურადღება გერმანული მოდელის დიზაინსა და უნიკალურ ექსტერიერზეა გამახვილებული. ცნობისთვის, xDrive45-ის მონაცემები 2026 წლისთვის გაუმჯობესდა. ეს ვერსია ახლა 402 ცხენის ძალას გამოიმუშავებს, ერთი დამუხტვით 500 კილომეტრის დაფარვის საშუალებას იძლევა და 0-დან 100-მდე 5 წამზე ნაკლებ დროში ჩქარდება. იმავე კატეგორიაში Edmunds-ი Mercedes-Benz EQE 350+-საც ასახელებს და მის მაღალ ხარისხს, ელეგანტურ სალონსა და დაფარვის დიდ დიაპაზონს გამოარჩევს.

Rivian R1S და Lucid Gravity - საუკეთესო დიდი ზომის მდიდრული ელექტრო SUV

დიდი ზომის მდიდრულ ელექტრო SUV-ებს შორის Edmunds-ი Rivian R1S-სა და Lucid Gravity-ს ასახელებს. მათ ამ სეგმენტში ყველაზე მაღალი — 10-დან 7.8 ქულა მიიღეს. ახალი Gravity უფრო მეტად ოჯახისთვის განკუთვნილი ელექტრომობილია, რომელშიც დიდი ყურადღება სალონის განლაგებასა და სივრცეს ეთმობა. მეორე მხრივ, Rivian R1S უფრო ელექტრო Range Rover-ს ჰგავს და „ოფ-როუდ“ მგზავრობისთვისაც გამოდგება. ეს მოდელი, ბატარეის სიმძლავრის მიხედვით, 430-დან 660 კილომეტრამდე დაფარვის დიაპაზონს უზრუნველყოფს.

Hyundai Ioniq 5 N - საუკეთესო წარმადობის მქონე ელექტრო SUV

რაც შეეხება საუკეთესო წარმადობის მქონე ელექტრო SUV-ს, ამ კატეგორიაში საუკეთესო ალტერნატივად Edmunds-ი Hyundai Ioniq 5 N-ს ასახელებს. ანალიტიკური ფირმის შეფასებით, ეს მოდელი ერთ-ერთი საუკეთესო მძლავრი SUV-ია. 2025-26 წლების მოდელი 641-დან 650 ცხენის ძალამდე გამოიმუშავებს და 100 კმ/სთ-მდე სულ რაღაც 3.4 წამში ჩქარდება. 84 კვტ/სთ-ის აკუმულატორისა და 800-ვოლტიანი სისტემის დახმარებით კი, მოდელი 10-დან 80%-მდე 18 წუთში იმუხტება. დამატებით, ამ მოდელს ისეთი მახასიათებლებიც გამოარჩევს, როგორიცაა სიმულაციური სიჩქარეების გადამრთველი და ძრავის ხმა, რაც მძღოლებისთვის მართვისგან მიღებულ გამოცდილებას აუმჯობესებს.