საწვავის მზარდი ფასი ამერიკელების ცხოვრების წესს ცვლის — კვლევა

დაზღვევის კოლოსალურ ხარჯებსა და საწვავის კატასტროფულად გაზრდილ ფასებს შორის მოქცეული ამერიკელი მძღოლები დაზოგვის გზებს აქტიურად ეძებენ. ეს ტენდენცია სულ უფრო მეტ მძღოლს აიძულებს, ყოველდღიური რუტინა შეცვალოს.

LendingTree-ს ახალი კვლევის თანახმად, ამერიკელთა 20% საჭესთან იმაზე იშვიათად ჯდება, ვიდრე ერთი წლის წინ, ხოლო გამოკითხულთა 64%-მა ამის მთავარ მიზეზად საწვავის მაღალი ფასი დაასახელა. ეს გასაკვირი არც არის — ერთი გალონი ბენზინის საშუალო ფასმა $4.07-ს მიაღწია, რაც შარშანდელთან შედარებით 93 ცენტით მეტია. ეს 29.6%-იან ზრდას ნიშნავს, რაც დიდწილად ირანთან კონფლიქტითაა განპირობებული. საწვავის გაძვირების მიუხედავად, რესპონდენტთა 34%-მა აღნიშნა, რომ წინა წელთან შედარებით ავტომობილით უფრო მეტს გადაადგილდება. მათ შორის განსაკუთრებით ჭარბობენ Z თაობის წარმომადგენლები (56%) და 18 წლამდე ასაკის შვილების მშობლები (52%).

ზოგადი სურათი აჩვენებს, რომ ამერიკელთა 81%-მა ავტომობილით გადაადგილების გაძვირების გამო გარკვეული ცვლილებები გაატარა. მათ შორის, მძღოლები ცდილობენ რამდენიმე საქმე ერთ მგზავრობაში გააერთიანონ (38%), საერთო ჯამში ნაკლები იარონ (31%) და ავზის შევსებამდე შედარებით იაფი ბენზინგასამართი სადგურები ეძებონ (28%). ზოგიერთი საერთოდ უარს ამბობს გარკვეულ მგზავრობებზე, ნაწილი კი ავტომობილის შეძენასა თუ ტექნიკურ მომსახურებას გადაავადებს.

რაც შეეხება ხარჯებს, გამოკითხულთა 10% ტრანსპორტირებაში თვეში $1000-ს ან მეტს ხარჯავს. 30%-ის ხარჯი $100-ზე ნაკლებია, ხოლო 26% თვიურად $100-დან $249-მდე იხდის. გარდა ამისა, 20% ხარჯავს $250-დან $499-მდე, ხოლო 14% — $500-დან $999-მდე.

თუმცა, აღსანიშნავია, რომ რესპონდენტთა მხოლოდ 68%-მა დაადასტურა, რომ მართავს ავტომობილს და მასზე რეგულარული წვდომა აქვს, რის გამოც ეს მონაცემები, სავარაუდოდ, ოდნავ შემცირებულ რეალობას ასახავს. ეს გარემოება იმასაც ხსნის, თუ რატომ აღნიშნავს გამოკითხულთა 29%, რომ კვირაში ერთხელ მაინც სხვასთან ერთად (Carpooling) მგზავრობს — ეს პრაქტიკა ყველაზე მეტად სწორედ Z თაობაშია გავრცელებული, რომელთა ნაწილსაც საკუთარი ავტომობილი ჯერ არ ჰყავს.