თითქმის 100 წლის Ford-მა Ram-ის პიკაპების საცდელი მოედანი შეარცხვინა

დღევანდელობაში, სადაც პიკაპები და SUV-ები ჩვეულებრივ სედანებსა და ჰეჩბექებს გაყიდვებით დომინანტურად ამარცხებენ, მარკეტინგის უდიდესი წილი სწორედ ოფ-როუდ შესაძლებლობებზე მოდის. ითვლება, რომ თანამედროვე მაღალი გამავლობის ტექნოლოგიები ნებისმიერ ძველ მანქანას მარტივად სჯობნის — თუმცა, როგორც ჩანს, ყოველთვის ასე არ არის.

ოკლაჰომას შტატის გამოფენაზე Stellantis-ის პიკაპების ბრენდმა Ram-მა სპეციალური მოკლე ოფ-როუდ ტრასა მოაწყო, რათა თავისი უახლესი პიკაპების შესაძლებლობები ეჩვენებინა. თუმცა, შოუ სრულიად მოულოდნელმა სტუმარმა მოიპარა — აბსოლუტურად ქარხნულმა, იდეალურად შემონახულმა 1928 წლის Ford Model A-მ, რომელსაც ოფ-როუდთან არანაირი შეხება არ უნდა ჰქონოდა.

ასევე იხილეთ:  როგორ შექმნა ღარიბმა ფერმერმა ბიჭმა „ფორდის“ იმპერია? 

როგორც ვიდეოში ჩანს, კლასიკური Ford Model A სრულად ქარხნული სახით შევიდა ტრასაზე და პიკაპებისთვის შექმნილი ბორცვები და დაბრკოლებები ყოველგვარი დაყოვნებისა და ძალისხმევის გარეშე გადალახა. მისმა დაკიდების სისტემამ ისე მოქნილად იმუშავა, როგორც ნამდვილ სპეციალიზებულ ოფროუდერს შეეფერებოდა.

რეალურად, ამაში გასაკვირი არც არაფერია: Ford Model A იმ დროს შეიქმნა, როდესაც მოასფალტებული გზები იშვიათობას წარმოადგენდა, ამიტომ უსწორმასწორო რელიეფთან გამკლავება მისი ყოველდღიურობა იყო. მიუხედავად იმისა, რომ ტრასა არ იყო მაინცდამაინც ექსტრემალური, ის მაინც ახალი თაობის პიკაპების შესაძლებლობების წარმოსაჩენად შეიქმნა და საუკუნის წინ გამოსული ავტომობილისგან მის დამარცხებას არავინ ელოდა...

რა თქმა უნდა, არსებობს უამრავი რამ, რის გაკეთებაც ახალ Ram პიკაპს შეუძლია და ძველ Model A-ს — არა. თუმცა, მწარმოებლისთვის მაინც უხერხული რეალობაა, როდესაც ჩვენი დიდი ბაბუების ბავშვობის დროინდელი ავტომობილი იმავე ტრასას ისე გადის, თითქოს არაფერი მომხდარა.