მორიგი სიგიჟე: BYD-ის SUV-მა Boeing 747 მხოლოდ 2 ბორბლითა და ელექტროენერგიით გაათრია
ბევრ თქვენგანს ემახსოვრება 2000-იანი წლების ცნობილი მარკეტინგული ტრიუკი, როდესაც Volkswagen Touareg V10 TDI-მ გიგანტური Boeing 747 ბუქსირით გაათრია. მოგვიანებით, 2017 წელს, ეს რეკორდი Porsche-მ მოხსნა და Cayenne S Diesel-ით ბევრად მძიმე Airbus A380 დაძრა ადგილიდან. ახლა კი ასპარეზზე ჩინური გიგანტი BYD-ი გამოვიდა და თამასა სრულიად ახალ, აბსურდულ სიმაღლეზე ასწია.
ბრიტანეთში, დანსფოლდის აეროდრომზე, BYD-ის პრემიუმ ბრენდის დამუხტვადმა ჰიბრიდულმა ყველგანმავალმა — Denza Bao 5-მა 180-ტონიანი Boeing 747 მხოლოდ ელექტროენერგიის გამოყენებით გაათრია. თუმცა, ექსპერიმენტი ამით არ დასრულებულა: ინჟინრებმა სიმძაფრისთვის ავტომობილს ორი ბორბალი საერთოდ მოხსნეს (საავტომობილო სამყაროში ტრიუკების მრავალფეროვნება მართლაც არასდროს ილევა).
სამი ეტაპი და ჰიდრავლიკური დაკიდების დემონსტრაცია
საჭესთან BYD UK-ის უფროსი ტექნიკოსი მარკ გალიფანტი იჯდა. სამი გარბენის განმავლობაში ყველგანმავალმა ლაინერი ჯამში 1600 მეტრის მანძილზე გადააადგილა — პირველი გარბენი სტანდარტულად, ოთხივე ბორბალზე შესრულდა, მე-2 გარბენი — სამ ბორბალზე, ხოლო საბოლოო — მხოლოდ ორ ბორბალზე.
ასევე იხილეთ: როგორ იგებს ჩინეთი ელექტრომობილების ომს?
ამ უჩვეულო გამოწვევის მთავარი მიზანი Bao 5-ის ჭკვიანი, თვითრეგულირებადი ჰიდრავლიკური დაკიდების სისტემის — DiSus-P-ის შესაძლებლობების დემონსტრირება იყო, რომელმაც მოხსნილი ბორბლების პირობებშიც კი შეძლო ავტომობილის ბალანსისა და ჰორიზონტალური მდგომარეობის შენარჩუნება.
Denza-ს წარმომადგენლების თქმით, ავტომობილის ძალური აგრეგატი და სავალი ნაწილი პრაქტიკულად ქარხნული დარჩა, თუმცა ფიზიკის კანონების დასამორჩილებლად და საბურავების ასფალტთან მოჭიდების გასაზრდელად გარკვეული მომზადება მაინც გახდა საჭირო — დამონტაჟდა სპეციალური საბუქსირე სამაგრი და მცირე ზომის დამხმარე სტაბილიზატორები ღერძებზე. ასევე, სალონიდან ამოიღეს სავარძლები და ავტომობილი დამატებითი სიმძიმით დატვირთეს — სამ ბორბალზე მოძრაობისას ბალასტმა 2000 კგ, ხოლო ორ ბორბალზე რეკორდული გარბენისას 4500 კგ შეადგინა.
საინტერესოა, რომ ტესტის დღეს ძლიერმა წვიმამ ასფალტზე მოჭიდება მნიშვნელოვნად გააუარესა, რის გამოც გუნდს საფარის გაშრობამდე მოცდა მოუწია. საბოლოოდ ექსპერიმენტმა წარმატებით ჩაიარა — ინჟინრების განცხადებით, 180-ტონიანი თვითმფრინავის ორ ბორბალზე გათრევის შემდეგაც კი, Bao 5-ს დაზიანების არანაირი კვალი არ აღმოაჩნდა.
კომენტარები
იყავით პირველი, ვინც დაწერს კომენტარს