ნამდვილი საოცრება BMW-გან - BMW Concept Touring Coupe

Z4-ზე დაფუძნებული Concept Touring Coupe 40-იანი წლების სარბოლო ავტომობილის შთაგონებითაა შექმნილი, თუმცა ის Z3 M Coupe-საც აცოცხლებს.

BMW Z3 M Coupe-ს გამოსვლას ბევრი ენთუზიასტი კრიტიკით შეხვდა. მოყვარულთა ამ ნაწილს M Coupe-ს სტილი არ მოსწონდა. თუმცა, რაც უფრო მეტი დრო გავიდა, BMW-ს 2000-იანი წლების დიზაინი უფრო მეტად დაფასდა. Z3 M Coupe-ს ზედმეტსახელად „კლოუნის ფეხსაცმელიც“ შეარქვეს. ამ ავტომობილის შეძენა კი, მაღალი ღირებულების გამო, დღეს ძალიან გაგიჭირდებათ.

BMW-ს Z3-ის კუპე ვერსიის არსებობა აშკარად არ დავიწყებია. რატომ? მეგობრებო, თქვენ წინაშია ბავარიელების უახლესი ნამუშევარი - BMW Concept Touring Coupe.

ეს 2 კარიანი ავტომობილი ე.წ. „შუთინგ ბრეიქ“ სტილისაა. ერთი შეხედვით ის Z3 M Coupe-ს მოგაგონებთ. თუმცა, BMW-ში აცხადებენ, რომ ამ ავტომობილის შექმნის შთაგონება 328 Touring Coupe-ა (ქვემოთ პირველივე სურათი). ეს ავტომობილი 1940-იანი წლებში გამძლეობის რბოლებში იღებდა მონაწილეობას.

Concept Touring Coupe-ს პრეზენტაციაზე კომპანიის წარმომადგენლებმა თქვეს, რომ მანქანა ერთ ეგზემპლარად შექმნილი საწარმოო მოდელია. ის Z4-ის კაბრიოლეტ ვერსიაზეა დაფუძნებული და სწორედ ამ ავტომობილის ესთეტიკაში „ზის“. თუმცა, კაბრიოლეტისგან მას დაბერილი უკანა ფრთები და საბარგული გამოარჩევს.

Concept Touring Coupe სპეციალურ, Sarling Lario-ს ფერშია შეღებილი და საოცრად გამოიყურება. ასევე, კორპუსზე შეინიშნება ღია ბრინჯაოსფერი აქცენტებიც. ამავე ფერშია შეღებილი ულამაზესი 20-იანი დისკები. უფრო ზუსტად კი წინ 19-იანი, ხოლო უკან 20-დუიმიანი ალუმინის დისკები.

საოცრად გამოიყურება ინტერიერიც. სალონი იტალიურ სპორტულ ავტომობილს მოგაგონებთ. ამ ყველაფერზე Poltrona Frau-მ იმუშავა. იქ ორი ფერის ტყავია გამოყენებული და გამოსარჩევი ფერის აქცენტები გვაქვს. სალონის ზედა ნაწილი მუქი ფერისაა, რაც იდეალურ კონტრასტს გვაძლევს. საბარგულში სპეციალური შეკვეთით დამზადებული ჩანთები დაგხვდებათ. ზუსტად ისეთი, როგორიც Ferrari-შია.

BMW ავტომობილის ტექნიკურ მახასიათებლებზე ზედაპირულად საუბრობს. რაც ვიცით ისაა, რომ კაპოტის ქვეშ 3-ლიტრიანი ორტურბინიანი 6-ცილინდრიანი ძრავაა.

არსებობს ჭორები, რომ BMW ამ ავტომობილს შეზღუდული რაოდენობით გამოუშვებს. კერძოდ, 50 ეგზემპლარი შეიქმნება. თითოეულის ღირებულება კი 250 000$ იქნება.