აკიო ტოიოდამ შუაძრავიანი მოდელის გამოშვება დააანონსა | Toyota-ს სიურპრიზი

ტოკიოს ავტო სალონამდე რამდენიმე დღით ადრე, Toyota-ს თავმჯდომარემ, აკიო ტოიოდამ შუაძრავიანი, ორსავარძლიანი მოდელის გამოშვება დააანონსა — ტოიოდას მინიშნება ავტომოყვარულებს შორის განხილვის საგნად უკვე იქცა. 

იაპონური ავტომწარმოებლის პერფორმანსზე ორიენტირებულმა Gazoo Racing მიმართულებამ თიზერი გამოაქვეყნა, რომლითაც სპეკულაციები მხოლოდ უფრო გააცხოველა — ავტომობილის სახელი და სილუეტი საიდუმლოდ დარჩა, თუმცა ფანები ვარაუდობენ, რომ Tokyo Auto Salon-ზე MR2-ის დაბრუნებას უნდა ველოდოთ.

სპეკულაციების საფუძველი გახდა ისიც, რომ ცოტა ხნის წინ, ტოიოტამ სახელწოდება „GR MR2-ზე“ პატენტი მოიპოვა. გარდა MR2-ისა, ერთ-ერთ კანდიდატად მოიაზრება ახალი GR Yaris M-ის კონცეპტიც, რომელიც ტოკიოს ავტო სალონზე გასულ წელს გამოჩნდა. 

აკიო ტოიოდას სიტყვები, რომლებმაც მითქმა-მოთქმა გამოიწვია, Toyota Gazoo Racing-ის X-ის ანგარიშზე გამოქვეყნდა. ვიდეოში ისმის საუბარი თავმჯდომარესა და სტაფის ერთ-ერთ წევრს შორის, რომელშიც ტოიოდა უმხელს თანამშრომელს ინფორმაციას შუაძრავიანი მოდელის ჩანაფიქრის შესახებ. 

თუ არ გახსოვთ, MR2 1984 წლიდან 2007 წლამდე იწარმოებოდა და ამ პერიოდში სამი სხვადასხვა თაობის გამოშვება მოესწრო — სამივე მათგანს შუაში განლაგებული ძრავა და მხოლოდ 2-ადგილიანი სალონი გამოარჩევდა. 

მე-4 თაობის MR2-ის შესახებ სპეკულაციები ჯერ კიდევ 2023 წლის ბოლოს დაიწყო, როცა ავტომწარმოებელმა FT-Se-ს კონცეპტი წარადგინა. საუბრები გაძლიერდა მას შემდეგ, რაც ტოკიოს ავტოშოუზე 2025 წლის დასაწყისში ხსენებული GR Yaris M პროტოტიპი ვიხილეთ — ავტომობილი 2-ლიტრიანი, ტურბოჩაბერვის მქონე, 4-ცილინდრიანი ძრავის ირგვლივ იყო აგებული და სრულად ამძრავიც გახლდათ. ამავე Auto Salon-ზე ინჟინრებმა დაადასტურეს, რომ ეს პროტოტიპი, შესაძლოა, რომელიმე სერიული მოდელის საფუძველი გამხდარიყო. 

ნებისმიერ შემთხვევაში, 9 იანვარი არაერთ სიურპრიზს გვპირდება. მათ შორის, მოსალოდნელია, რომ ვიხილავთ ახალ Celica-საც, რომელსაც ამჯერად შუაში განლაგებული ძრავა ექნება. წარსულში ტოიოტამ არაერთხელ დაადასტურა, რომ რალის ლეგენდარული მოდელი აუცილებლად დაბრუნდებოდა, თუმცა როდის მოხდებოდა ეს, არ ვიცოდით (და ზუსტად არც ახლა ვიცით)...