რა მოხდება თუ საგზაო ავტომობილს F1-ის საბურავებს დავუყენებთ?

იმისათვის, რომ გაეგოთ, შესაძლებელია თუ არა სტანდარტული საგზაო ავტომობილის ხმაურიან სარბოლო მანქანად გადაქცევა, რამდენიმე „იუთუბერმა“ გადაწყვიტა Toyota MR2-ზე F1-ის საბურავები დაეყენებინათ. მაგრამ ექსპერიმენტის დასრულებიდან მალევე მიხვდნენ, რომ ავტომობილისთვის სიჩქარის გაზრდა ისეთი მარტივი საქმეც არაა, როგორიც თავდაპირველად ეგონათ. 

ფორმულა 1-ის ბოლიდები პლანეტის უსწრაფეს ავტომობილებს შორის არიან. მიუხედავად იმისა, რომ ზოგიერთი სუპერქარი მათ სწორ გზებზე სიჩქარით შესაძლოა ასწრებდეს, ტრასებზე ისინი შეუდარებელია. F1-ის თითოეული ბოლიდი მოსახვევებში სწრაფად შესვლისთვისაა შექმნილი და ეს შეუძლებელია მათი საბურავების გარეშე, რომლებიც გზებს წებოსავით ეკვრიან.

მაშინ, რა ხდება, როდესაც საგზაო ავტომობილს F1-ის საბურავებს დავუყენებთ?

საჯარო გზებზე მოძრავი ყველა ავტომობილი საბურავებთან დაკავშირებულ მკაცრ რეგულაციებს უნდა აკმაყოფილებდეს - პირველ რიგში, რა თქმა უნდა, უსაფრთხოებისთვის. ყველა ტიპის საბურავს უნდა ჰქონდეს ღრმა საბურავის პროტექტორი, მოჭიდების უზრუნველსაყოფად. თუმცა F1-ის საბურავები სრულად განსხვავებულია. ისინი სრულად გლუვია და გზას მჭიდროდ ეწებება. F1-ის ყველა გულშემატკივარმა იცის საბურავების ტიპები, რომლებიც სხვადასხვა პირობებში შესანიშნავ შესრულებას გვთავაზობს.

თუმცა, F1-ის პილოტებს სჭირდებათ, რომ მოჭიდების შესაქმნელად მათი საბურავები საკმარისად გაცხელდეს. ხშირად კი მათი ტემპერატურა 110°C-მდეც კი ადის.

„იუთუბერებმა“ ტესტირებისთვის Toyota MR2 აირჩიეს, რადგან მისი საბურავების ზომა F1-ის რეგულირებად ბოლიდებს ემთხვეოდა. მაგრამ გახურების გარეშე დაქოქვის შემდეგ, ისინი უბრალოდ უსარგებლო აღმოჩნდა, რადგან პირველივე მოსახვევში მანქანა ამოტრიალდა.  

თუმცა, სწორ ხაზზე სპრინტით რამდენჯერმე გახურების შემდეგ, F1-ის საბურავებმა მალევე მუშაობა დაიწყო და Toyota MR2-მაც უფრო მაღალი სიჩქარე დააფიქსირა. როგორც „იუთუბერები“ იხსენებენ, ეს ყველაფერი 11 000 გირვანქა სტერლინგზე მეტი დაჯდა, თუმცა მათ იდეალურად კარგი ავტომობილი შექმნეს და ექსპერიმენტსაც არ ნანობენ.