კანადა ჩინურ ელექტრომობილებს გზას უხსნის | რას გულისხმობს ახალი შეთანხმება?

კანადის ოფიციალური პირების განცხადებით, რამდენიმე ჩინელი ავტომწარმოებელი კანადის ტერიტორიაზე ხელმისაწვდომი მოდელების წარმოებითაა დაინტერესებული. ეს განცხადება სულ რამდენიმე დღეში გაკეთდა მას შემდეგ, რაც ქვეყანამ მსოფლიოში ელექტრომობილების უდიდეს მწარმოებელ ერთან ახალი სავაჭრო შეთანხმება გააფორმა.

სახელმწიფოებს შორის მიღწეული შეთანხმებით, კანადაში იმპორტირებულ ჩინურ ელექტრომობილებზე ტარიფები მკვეთრად შემცირდება — 100%-დან 6.1%-მდე. ხელშეკრულების პირობებით, თავდაპირველად იმპორტის რაოდენობა წელიწადში 49 000 ავტომობილამდე შეიზღუდება, მათი სულ მცირე ნახევრის ღირებულება კი 25 000 დოლარამდე უნდა იყოს.

აღნიშნულ შეზღუდვასთან დაკავშირებით მხარეებმა შეთანხმებაში განმარტეს, რომ ბაზრის „დატბორვის“ ნაცვლად, 49 000 ერთეული მანქანა შეესაბამება 2023 წელს კანადაში იმპორტირებული ჩინური წარმოების ელექტრომობილების რაოდენობას. კანადურმა მხარემ შეთანხმება შეაფასა როგორც საწყისი ეტაპი, რომელიც ჩინელ ავტომწარმოებლებსა და ადგილობრივ კომპანიებს შორის თანამშრომლობის წახალისებას ემსახურება.

ცნობისთვის, ნებისმიერ ჩინურ ავტომწარმოებელს, რომელიც კანადაში ელექტრომობილების წარმოებას გეგმავს, მოუწევს ქვეყნის შრომითი სტანდარტები დააკმაყოფილოს. „ჩვენ არ გვინდა ვიყოთ კონკურენტუნარიანი 2000-იანი ან 2010-იანი წლების ბაზარზე“, — განაცხადა კანადურმა მხარემ, — „ჩვენ გვსურს, რომ მომავალში ბაზარზე კონკურენტუნარიანები გავხდეთ“.

მიწოდების შეფერხებებთან დაკავშირებული შეშფოთების აღმოსაფხვრელად, კანადურმა მხარემ ასევე აღნიშნა, რომ იმპორტის შეზღუდვა ქვეყანაში ავტომობილების წლიური გაყიდვების სამ პროცენტზე ნაკლებს შეადგენს (რაც ჯამში დაახლოებით 1.8 მილიონი მანქანაა). მათ შეთანხმება „მოკრძალებულად“ შეაფასეს და აღნიშნეს, რომ პირობები სამი წლის შემდეგ გადაიხედება და ბაზარზე მისი გავლენაც შეფასდება.

საინტერესოა, რომ შეთანხმებას კანადის ოფიციალურ პირებს შორის კრიტიკოსებიც გამოუჩნდნენ. ისინი შიშობენ, რომ ჩინურ ელექტრომობილებზე ტარიფების შემცირება ადგილობრივ ეკონომიკას დააზარალებს და აშშ-სთან პარტნიორობას საფრთხის ქვეშ დააყენებს.