2025 წლის დეკემბერში ევროპაში გაყიდული ყოველი მე-10 ავტომობილი ჩინური იყო
ჩინური ავტომწარმოებლები ევროპულ ბაზარზე ფეხის მოკიდებას აგრძელებენ — სტატისტიკა დასავლური ავტომწარმოებლებისთვის თანდათან უფრო და უფრო შემაშფოთებელი ხდება. თუ გასული წლის ბოლოს გაერთიანებულ სამეფოში გაყიდული ავტომობილების 10% ჩინური იყო, ახლა ეს ტენდენცია მთელ ევროპაზე გავრცელდა — ევროპელი მძღოლების მიერ შეძენილი ყოველი მე-10 ავტომობილი ჩინეთშია წარმოებული...
ერთიან ნიშნულებს თუ ავიღებთ, გაიზარდა ჯამურად გაყიდული ავტომობილების რაოდენობაც — თუ 2024 წელს ევროპულ ბაზარზე 12 994 720 მანქანა გაიყიდა, 2025 წელს ამ რიცხვმა 13 295 075-ს მიაღწია. ზრდის დიდი ნაწილი დეკემბრის თვეზე მოვიდა, რომელშიც 2024 წლის დეკემბერთან შედარებით, 80 000-ით მეტი მანქანა გაიყიდა. 
დეკემბერი გამორჩეული იყო იმითაც, რომ ისტორიაში პირველად, ევროპულ ბაზარზე ჩინური ავტომწარმოებლების მოდელების გაყიდვებმა 100 000-ს გადააჭარბა (109 864). წლიურმა გაყიდვებმა კი 99%-იანი ზრდა აჩვენა და 810 982 ერთეული შეადგინა — შესაბამისად, 2025 წლის ბოლოს ევროპული ბაზრის 6.1%-ს, ყველა სეგმენტში ერთად, ჩინური ავტომობილები იკავებდნენ. ტენდენცია კი მხოლოდ მზარდია...
რომელი ჩინური ავტომწარმოებელი გაიზარდა ყველაზე მეტად?
ყველაზე გაყიდვადი ჩინური მწარმოებელი SAIC გახდა, რომელიც ძალიან წარმატებულ ბრიტანულ ფირმა MG-ს ფლობს. გასულ წელს ევროპაში SAIC-მა 307 812 მანქანის ქაყიდვა შეძლო. 
მე-2 ადგილზე უკვე ყველასათვის კარგად ცნობილი BYD გავიდა, რომლის გაყიდვებმაც 200%-ზე მაღალი წლიური ზრდა დააფიქსირა და 186 612 ერთეული შეადგინა. განსაკუთრებით წარმატებულ მოდელებს შორის მოხვდნენ Seal U, Dolphin Surf, Sealion 9 და Seal. 
BYD-ს ოდნავ ჩამორჩა Chery — ავტომწარმოებელმა 2025 წელს 120 207 მანქანა გაყიდა, რაც 2024 წლის 17 038 ერთეულთან შედარებით, გიგანტური ზრდაა. ამაში წვლილი კომპანიის მფლობელობაში მყოფმა ორმა ბრენდმა, Jaecoo-მ და Omoda-მ შეიტანეს. 
400 725 ავტომობილი გაყიდა Geely-მაც, თუმცა ამ რიცხვის უდიდესი ნაწილი, 332 226 ერთეული Volvo-ს მოდელი იყო, ამიტომ ავტომწარმოებელი ამ „საპატიო“ სიაში ვერ მოხვდა.
საინტერესოა, რომ მე-6 ადგილზე გავიდა დასავლური ჯგუფის, Stellantis-ის მფლობელობაში არსებული ჩინური ბრენდი Leapmotor-ი, რომლის კომპაქტური ელექტრომობილი T03, როგორც ჩანს, საკმაო პოპულარობით სარგებლობს. 
როგორც ჩანს, ევროპელი მომხმარებლის პრეფერენციები შეიცვალა და ახლა ბიუჯეტურ, ელექტრიფიცირებულ ავტომობილებს ბევრი მძღოლი ეძებს...
