საუკეთესო ჰიბრიდული ავტომობილები 2026 წლისთვის | კვლევა

ჰიბრიდული ავტომობილების ხსენებაზე პირველი, ალბათ, ყველას Toyota და მისი ერთ-ერთი ყველაზე გაყიდვადი მოდელი, Prius-ი ახსენდება. ამის მიუხედავად, დღეს ჰიბრიდული ავტომობილების ბაზარი საკმაოდ მრავალფეროვანია და მრავალი სტილისა და ბრენდის მოდელს გვთავაზობს.

წარმოდგენილ სიაში შემავალმა ავტომობილებმა კი Edmunds-ის კერძო სატესტო ტრასაზე ჩატარებული ვრცელი ტესტირების სერიაში, ასევე რეალურ სამყაროში რამდენიმეკვირიანი გამოყენებისა და სხვადასხვა კონკურენტ ჰიბრიდებთან შედარებითი ანალიზის საფუძველზე, საუკეთესო შედეგები დააფიქსირეს.

შედეგად, Edmunds-ის კვლევით, საუკეთესო კომპაქტურ ჰიბრიდულ ავტომობილად Honda Civic-ი დასახელდა. შედარებითი ანალიზისა და ტესტირებების საფუძველზე, Honda Civic-მა მნიშვნელოვანი უპირატესობა აჩვენა საწვავის ეკონომიისა და შესრულების გათვალისწინებით. Edmunds-ის თანახმად, კერძო სატესტო ტრასაზე Honda Civic-მა 0-დან 100-მდე სიჩქარე 6.6 წამში განავითარა, რაც უფრო სწრაფია, ვიდრე Civic Si-ის მოდელი. სწორხაზოვანი აჩქარების გარდა, Civic Hybrid-ით ქალაქში მართვა სასიამოვნო და მოსახერხებელია.

მაგრამ, Edmunds-ის რჩევით, თუ Civic-ის ფასი ცოტათი მაღალი გეჩვენებათ, მაშინ Hyundai Elantra Hybrid ძალიან კარგი ალტერნატივაა. მისი საერთო რეიტინგი 10-დან — 7.6 — ოდნავ ჩამოუვარდება Civic-ის 7.9-ს, თუმცა უსწრებს Toyota Prius-ს (7.4-ს). Elantra-ს ასევე, ფასის გათვალისწინებით, საკმაოდ კარგი ტექნიკური მახასიათებლები, ფართო სალონი და საბარგული აქვს.

Edmunds-ის საუკეთესო საშუალო ზომის ჰიბრიდული ავტომობილი Toyota Camry-სა და Honda Accord-ს შორის უნდა აირჩიოთ. დიდი ხნის კონკურენტებმა ერთნაირი — 8.3 ქულა — შეფასებები მიიღეს. თუმცა კვლევა, ტექნიკური მახასიათებლების გამო, პირველ ადგილზე მაინც Camry-ს აყენებს. ამას ემატება Toyota-ს ბოლოდროინდელი რედიზაინი, რომელმაც ყველა Camry-სთვის ერთი და იგივე ჰიბრიდული ძრავა გათვალა.

თუმცა უნდა ვახსენოთ ის გაუმჯობესებები, რომლებიც 2026 წლის Accord-ში ვიხილეთ. მათ შორის, ახლა ყველა ვერსიას 9-დიუმიანი სენსორული ეკრანი და უფრო თანამედროვე ინტერფეისი აქვს. ამის მიუხედავად, Google-ის ტექნოლოგია კვლავ ექსკლუზიურად ყველაზე ძვირადღირებულ ვერსიაზეა წარმოდგენილი.

რაც შეეხება მდიდრული ჰიბრიდული მოდელების კატეგორიას, აქ Edmunds-ის კვლევით საუკეთესო Lexus ES 300h-ია. Edmunds-ის კვლევის ავტორების შენიშვნით, მდიდრული ჰიბრიდული ავტომობილების ბაზარზე კონკურენცია გაცილებით დაბალია, თუმცა აღნიშნული მოდელის შემთხვევაში 2026 წლის მაისში სრულიად ახალ ვერსიას უნდა ველოდოთ და, სავარაუდოდ, ის ამ მოსაზრებებსაც უფრო მეტად გაამყარებს.