Red Bull-ის ისტორიული მანევრისთვის Rimac-ის ჰიპერქარები გამოიყენეს

ეს, ალბათ, ერთ-ერთი ყველაზე გიჟური სანახაობაა, რომელიც ოდესმე გინახავთ: თვითმფრინავის აფრენა და დაშვება ისეთ ვიწრო ასაფრენ ბილიკზე, რომელიც მოძრავი მატარებლის ვაგონის თავზეა განთავსებული. თუმცა Red Bull-ისგან უკვე აღარაფერი გვიკვირს და ეს ტრიუკიც ამის ნათელი მაგალითია.

ამ შემთხვევაში Red Bull-ის პილოტი იტალიელი დარიო კოშტაა, რომელსაც კომპანიამ ერთი „მარტივი“ ამოცანა დაუსახა: თავისი Zivko Edge 540 მოძრავი მატარებლის სახურავზე უნდა დაეშვა. ეს ყველაფერი თვითმფრინავისთვის წარმოუდგენლად დაბალი — 87 კმ/სთ — სიჩქარით უნდა გაეკეთებინა, თანაც აფრენა-დაშვების მანევრისთვის სასტიკად მოკლე, 50-წამიანი ინტერვალის პირობებში.

მანევრის შესასრულებლად თურქეთის ერთ-ერთი ქალაქის 2.5-კილომეტრიანი ლიანდაგი შეირჩა. შედეგი? ის, რასაც სტატიაში წარმოდგენილ ვიდეოში თქვენი თვალითაც ხედავთ. თუმცა ამ ამბის უკან რამდენიმე საინტერესო დეტალიც იმალება: მთავარ ყურადღებას ის ფაქტი იმსახურებს, რომ Red Bull-ის გუნდს ამ მანევრის შესრულებისას დახმარება Rimac-მა გაუწია.

როგორც წესი, სიმულაცია მანევრის ერთ-ერთი ყველაზე რთული ნაწილია: თვითმფრინავმა მოძრაობა 120 კმ/სთ სიჩქარით დაიწყო, თუმცა შემდგომ ნელ-ნელა უნდა შენელებულიყო, რათა მატარებლის სიჩქარეს იდეალურად აწყობოდა. Rimac Nevera R (ოფიციალურად ყველაზე სწრაფად აჩქარებადი სერიული ავტომობილი) და Rimac Nevera ტესტირებების დროს მატარებლის სიჩქარისა და მოძრაობის უკიდურესი სიზუსტით სიმულაციისთვის გამოიყენებოდა. ავტომობილების მიწოდების გარდა, Rimac-მა კოშტასთვის სპეციალური სავარძელიც შექმნა, რომელიც მანევრის შესასრულებლად საჭირო მოთხოვნებს იყო მორგებული.

„ეს პროექტი Rimac-ის იდეის შესანიშნავი გამოხატულებაა. დარიოს სჭირდებოდა რაღაც, რაც ამ დრომდე არასდროს გაკეთებულა. შესაბამისად, არც რაიმე დადგენილი მეთოდი და კონკრეტული გადაწყვეტა არსებობდა. ჩვენმა ჰიპერმანქანებმა მას რეალური, მოძრავი, მაღალსიჩქარიანი ორიენტირი მისცა; ისეთი რამ, რისი უზრუნველყოფაც მსგავსი სიზუსტითა და სიჩქარით მხოლოდ რამდენიმე ავტომობილს შეუძლია“, — განაცხადა მატე რიმაცმა.

ორი „ელექტრომხეცი“, შესაბამისად 1 914 და 2 107 ცხენის ძალით, კოშტასთვის აეროპორტის ასაფრენ ბილიკებზე საორიენტაციო ნიშნულს წარმოადგენდა. უნდა ითქვას, რომ მათი პოტენციალი ამ მანევრისას ბოლომდე არც გამოვლენილა — მათი მაქსიმალური სიჩქარე 400 კმ/სთ-ს აჭარბებს. ამის მიუხედავად, ჰიპერქარებმა დაკისრებული მოვალეობა წარმატებით შეასრულეს და კოშტა ავიაციის ისტორიაში პირველი პილოტი გახდა, რომელმაც თვითმფრინავით აფრენისა და დაშვების მანევრი მოძრავ მატარებელზე შეასრულა.