ჩინეთში მამაკაცი 160 000-დოლარიანი ავტომობილით დაკრძალეს
ჩინეთის ჩრდილო-აღმოსავლეთში მდებარე სოფელ ლიაოიანგში გამართული დაკრძალვის ცერემონია ქვეყნის მასშტაბით დიდი სკანდალისა და საზოგადოებრივი აღშფოთების მიზეზი გახდა. 70 წელს გადაცილებული მამაკაცი, რომელიც ფუფუნების საგნებისა და ავტომობილების დიდი მოყვარული იყო, შვილებმა ნამდვილი Mercedes-Benz S450L-ით დაკრძალეს.
ვირუსულ ვიდეოში ჩანს, როგორ ათავსებს ექსკავატორი შავ მერსედესს უზარმაზარ საფლავში. ავტომობილს, რომლის ღირებულებაც დაახლოებით 160 000 დოლარია, სიმბოლურად წითელი ქსოვილი ჰქონდა გადაფარებული. განსაკუთრებული ყურადღება მიიპყრო სახელმწიფო ნომერმა 8888, რაც ჩინურ კულტურაში სიმდიდრესთან ასოცირდება და ადგილობრივ ბაზარზე ასეთი ნომრის ფასი 37 000 დოლარს აღწევს.
ჩინური ტრადიციით, გარდაცვლილისთვის იმქვეყნიური კომფორტის შესაქმნელად ხშირად წვავენ ავტომობილების, სახლებისა და ტექნიკის ქაღალდის მაკეტებს, თუმცა ძინების ოჯახმა ტრადიციის გვერდის ავლით ნამდვილი ავტომობილის დამარხვა გადაწყვიტა, რაც მამისადმი განსაკუთრებული პატივისცემით ახსნეს.
საზოგადოების რეაქცია მკვეთრად უარყოფითი აღმოჩნდა. გარდა იმისა, რომ ბევრმა ეს სიმდიდრის უაზრო დემონსტრირებად აღიქვა, იურისტებმა და გარემოსდამცველებმა სერიოზულ საფრთხეებზე მიუთითეს. დაუმუშავებელი ავტომობილის მიწაში დამარხვა ნიადაგისა და გრუნტის წყლების ტექნიკური სითხეებითა და მძიმე ლითონებით დაბინძურებას იწვევს. გარდა ამისა, ავტომობილის უტილიზაციის ოფიციალური პროცედურის გვერდის ავლით დამარხვა ადმინისტრაციულ სამართალდარღვევას წარმოადგენს.
View this post on Instagram
სკანდალის გახმაურებიდან მეორე დღესვე საქმეში ადგილობრივი ხელისუფლება ჩაერია. ოჯახს „ფეოდალური ცრურწმენების“ გამო საყვედური გამოუცხადეს და ავტომობილის ამოღება დაავალეს. გარდა მოსალოდნელი ჯარიმებისა, ძინების ოჯახს მოუწევს დაფაროს ექსკავაციის, ტერიტორიის დასუფთავებისა და ეკოლოგიური რესტავრაციის ყველა ხარჯი. სოციალურ ქსელებში ამ ამბავს 30 მილიონზე მეტი ნახვა აქვს.
