მამაკაცმა 3D პრინტერით მინი GR Yaris-ი შექმნა | Toyota-მ ის მონტე-კარლოში მიიწვია

მაშინ, როცა ადამიანების უმეტესობა საკუთარ ფარეხში დაწყებული პროექტების დასრულებას საუკუნეებს ანდომებს და ბოლომდე ხშირად არც მიჰყავს ხოლმე, ავსტრალიელმა ჯასტინ უაითმა Toyota GR Yaris Rally1-ის მინი მოდელის შექმნას 13 თვე დაუთმო. შედეგად მან სრულად ფუნქციური, ერთადგილიანი ავტომობილი მიიღო, რომელმაც თავად Toyota Gazoo Racing-ის ყურადღებაც კი მიიპყრო.

ავტომობილის ძარა 123 ცალკეული დეტალისგან შედგება, რომლებიც ჯასტინმა 3D პრინტერით დაბეჭდა, შემდეგ კი საკუთარი ხელით გააერთიანა და დაამუშავა. მართალია, მინი-იარისს კარები არ აქვს, თუმცა სალონში მოხვედრა მოსახსნელი სახურავის საშუალებითაც საკმაოდ მარტივია. ავტომობილს აქვს სრულად ფუნქციური მაშუქები, მოძრავი ფანჯრები და პროფესიონალური ვინილის საფარი, რომელიც Toyota-მ სპეციალურად 2026 წლის სეზონისთვის შექმნილი ოფიციალური დიზაინით თავად მიაწოდა.

ამ პატარა „ურჩხულის“ საფუძველი კარტინგის შასია, რომელიც პროპორციების დასაცავად 580 მმ-ით დააგრძელეს. ავტომობილის კაპოტის ქვეშ მოტოციკლის მაღალბრუნიანი ძრავას ვხვდებით, რომელიც 118 ცხ.ძ-ს გამოიმუშავებს. 

იმის გათვალისწინებით, რომ პლასტმასის კორპუსის წყალობით მანქანა ძალიან მსუბუქუა, მისი სიმძლავრე შთამბეჭდავია. ტესტირებისას მან 94 კმ/სთ განავითარა, თუმცა ჯასტინის თქმით, მინი მოდელს 150 კმ/სთ-მდე აჩქარებაც შეუძლია.

პროექტი იმდენად ხარისხიანი აღმოჩნდა, რომ Toyota-მ ავტორი და მისი ქმნილება 2026 წლის სეზონის გახსნაზე, მონტე-კარლოში მიიწვია. მინი-იარისმა საფრანგეთის ალპებში, WRC-ის ნამდვილ ტრასებზე გაიარა ტესტირება და ნამდვილი GR Yaris Rally1-ის გვერდითაც დაიკავა ადგილი. პროექტით ისეთი პროფესიონალებიც კი მოიხიბლნენ, როგორებიც გუნდის ხელმძღვანელი იარი-მატი ლატვალა და პილოტები — ოლივერ სოლბერგი და სებასტიან ოჟიე არიან.

ეს შემთხვევა გვასწავლის, რომ შეზღუდული რესურსებით, მაგრამ დიდ მონდომებით, საკუთარი ავტოფარეხიდან პირდაპირ მსოფლიო რალის ეპიცენტრში შეიძლება მოხვდე...