ტეხასელმა მამაკაცმა 100 000$-იანი BMW M4 პიკაპად გადააქცია

ტექსასელმა კონტენტ-კრეატორმა, DinMann-მა, ავტომოყვარულთა საზოგადოება ორ ბანაკად გაყო — მან თავისი 100 000-დოლარიანი BMW M4 პიკაპად გადააქცია. ეს უჩვეულო პროექტი, რომელსაც ავტორმა M4 Maloo დაარქვა (ავსტრალიური ლეგენდის, Holden Maloo-ს პატივსაცემად), TJ Lamb-მა თავის YouTube არხზე, Magnacars-ზე დეტალურად გაგვაცნო.

გერმანიასა და შვედეთში გაზრდილი DinMann-ისთვის შთაგონების წყარო BMW-ს ორიგინალი E30 M3 Ute-ის პროტოტიპი გახდა. მან გადაწყვიტა, ეს იდეა თანამედროვე G82 მოდელზე გაეცოცხლებინა. პროცესი საკმაოდ დრამატული იყო — სრულიად ახალ ავტომობილს, რომელსაც მხოლოდ 1 800 მილი ჰქონდა გავლილი, სახურავი მოაჭრეს, სალონი დაშალეს და კორპუსი Instagram-ის პირდაპირ ეთერში გადაჭრეს. მთელ ამ გარდასახვას მხოლოდ ექვსი კვირა დასჭირდა.

მიუხედავად იმისა, რომ ავტომობილს უკანა სავარძლების ნაცვლად ახლა სატვირთო პლატფორმა აქვს, ის მაინც ნამდვილ სპორტქარად რჩება. კაპოტის ქვეშ სტანდარტული S58 3.0-ლიტრიანი Twin-Turbo ექვსცილინდრიანი ძრავა იმალება. ავტომობილს დაემატა Wagner Tuning-ის ნახშირბადის შემშვები კოლექტორი, გაუმჯობესებული ტურბოჩამბერები და GTHaus-ის გამოსაბოლქვი სისტემა.

რაც შეეხება აწ უკვე პიკაპის სიმძლავრეს, მართალია ზუსტი ციფრი არ სახელდება, მაგრამ მსგავსი მოდიფიკაციები ხშირად 800 ცხ.ძ-მდეც აღწევს (სტანდარტული 503 ცხ.ძ.-ის ნაცვლად). ავტომობილი HRE-ს დისკებით, ნახშირბადის ბოჭკოს დეტალებითა და სპეციალურად შექმნილი უკანა საბარგულითაც აღიჭურვა.

პროექტმა სოციალურ ქსელებში ნამდვილი ქაოსი გამოიწვია — ენთუზიასტების ნაწილი მიიჩნევს, რომ ეს საუკეთესო რამაა, რაც კი M4-ისგან შეიძლებოდა მიგვეღო. ბევრმა აღნიშნა, რომ ავსტრალიაში ეს მანქანა ძალიან პოპულარული იქნებოდა.

თუმცა, კრიტიკოსებიც აქვე არიან. „ის, რომ რაღაცის გაკეთება შესაძლებელია, არ ნიშნავს, რომ ეს უნდა გაკეთდეს“, — წერენ უკმაყოფილო ფანები, რომლებიც მიიჩნევენ, რომ ძვირადღირებული სპორტული კუპეს პიკაპად ქცევა ავტომობილის შეურაცხყოფაა. ამჟამად „M4 Maloo“ გასაყიდად არის გამოტანილი და მისი ფასი 145 000 დოლარია.

თქვენ როგორ ფიქრობთ, ეს პროექტი გენიალური საინჟინრო გადაწყვეტაა თუ ძვირადღირებული ავტომობილის უაზროდ გაფუჭება?