კვლევა | მამაკაცის სასქესო ორგანოს ზომასა და სპორტული მანქანების სიყვარულს შორის კორელაცია არსებობს

საავტომობილო სამყაროში ერთ-ერთი ყველაზე ძველი, გავრცელებული და გაცვეთილი სტერეოტიპი — სპორტული მანქანების სიყვარულისა და მამაკაცის ანატომიური „ნაკლოვანებების“ კავშირის შესახებ — როგორც იქნა, მეცნიერულად შემოწმდა. ლონდონის საუნივერსიტეტო კოლეჯის (UCL) ექსპერიმენტული ფსიქოლოგიის დეპარტამენტმა გამოაქვეყნა კვლევა ხმამაღალი სათაურით: „პატარა პენისები და სწრაფი მანქანები: ფსიქოლოგიური კავშირის მტკიცებულება“.

მიუხედავად იმისა, რომ ეს თემა ხშირად ხუმრობის საგანია, მეცნიერები საკითხს სრული სერიოზულობით მიუდგნენ და პირველად ისტორიაში დაადგინეს არა უბრალოდ კორელაცია, არამედ მიზეზ-შედეგობრივი კავშირი მამაკაცის თვითშეფასებასა და ძვირადღირებული სპორტული მანქანების ფლობის სურვილს შორის.

როგორ ჩატარდა ექსპერიმენტი: ფსიქოლოგიური მანიპულაცია

კვლევაში მონაწილეობა 200-მა ბრიტანელმა მამაკაცმა მიიღო, რომლებსაც თავდაპირველად წარმოდგენაც არ ჰქონდათ, რა იყო ტესტის რეალური მიზანი. მეცნიერებმა მათ მიაწოდეს ყალბი ინფორმაცია იმის შესახებ, თუ რა არის მამაკაცის სასქესო ორგანოს საშუალო ზომა ერეგირებულ მდგომარეობაში (რეალური საშუალო მაჩვენებელი მსოფლიოში 13-დან 14 სანტიმეტრამდე მერყეობს).

მონაწილეები ორ ჯგუფად დაყვეს:

• პირველ ჯგუფს უთხრეს, რომ საშუალო ზომა არის 18 სმ (რის გამოც ბევრმა მათგანმა თავი საშუალოზე დაბალი მონაცემების მქონედ იგრძნო).

• მეორე ჯგუფს კი მიაწოდეს ინფორმაცია, რომ საშუალო ზომა სულ რაღაც 10 სმ-ია (რამაც მონაწილეებში თავდაჯერებულობა გამოიწვია).

ამ ფსიქოლოგიური ფონის შექმნის შემდეგ, მამაკაცებს აჩვენეს სხვადასხვა პროდუქტების, მათ შორის სპორტული მანქანების ფოტოები და სთხოვეს მათი მიმზიდველობის შეფასება. შედეგების მიხედვით, იმ მამაკაცებმა, რომლებიც პირველ ჯგუფში მოხვდნენ, სპორტული ავტომობილები ბევრად უფრო მაღალი ქულებით შეაფასეს.

საინტერესოა ასაკობრივი ფაქტორიც: 29 წლამდე ასაკის მამაკაცებში ეს ეფექტი შედარებით დაბალი იყო, ხოლო 30 წელს გადაცილებულ მამაკაცებში ეფექტის ალბათობამ 95%-დან 99%-მდე მიაღწია.

რატომ მუშაობს ეს კავშირი?

ფსიქოლოგები ამ ფენომენს ორი ძირითადი მიზეზით ხსნიან:

1. „ფარშევანგის ეფექტი“: სიმდიდრისა და სტატუსის საჯარო დემონსტრირება პოტენციური პარტნიორების მოსაზიდად. ძვირადღირებული მანქანა მამაკაცს სხვების თვალში უფრო მიმზიდველს ხდის.
2. თვითშეფასების კომპენსაცია: როდესაც ადამიანის ეგო ან კაცური თავდაჯერებულობა დარტყმას იღებს, ქვეცნობიერი ცდილობს ამ დანაკლისის კომპენსირებას სხვა, მატერიალური და თვალშისაცემი ატრიბუტით. 

საუკეთესო მიზეზი სპორტული მანქანის შესაძენად

მსგავსი კვლევები საზოგადოებას უყურებს როგორც მასას, რომლისთვისაც ავტომობილი მხოლოდ სტატუსის სიმბოლო ან გადაადგილების უსულო საშუალებაა. თუმცა, ნამდვილი ენთუზიასტებისთვის — ავტოჰოლიკებისთვის — სპორტული მანქანის ყოლა სრულიად სხვა განზომილებაა.

ჩვენ არ ვყიდულობთ Porsche 911-ს იმისთვის, რომ ვინმეს ჩვენი ანატომია დავუმტკიცოთ. ჩვენ აღფრთოვანებულები ვართ მისი ჰიბრიდული ტურბო სისტემის საინჟინრო გენიალურობით, დაკიდების გეომეტრიით და იმ სუფთა, მექანიკური ემოციით, რასაც მართვის პროცესი გვანიჭებს. საუკეთესო მიზეზი სპორტული მანქანის შესაძენად არის მართვის სიყვარული და ის ემოციური კავშირი, რომელიც ავტომობილსა და მძღოლს შორის იბადება — სწორედ ის კომპონენტი, რომლის პოვნასაც თანამედროვე, ცივ ელექტრომობილებში ასე უშედეგოდ ვცდილობთ.

ასე რომ, თუ თქვენს ავტოფარეხში ყვითელი Corvette, მოდიფიცირებული Mustang Dark Horse ან თუნდაც მოკრძალებული Mazda Miata დგას, ნუ იდარდებთ ბრიტანელი მეცნიერების დასკვნებზე (ან იდარდეთ, თქვენი საქმეა...)