პოლონური კომპანია Porsche 911 Shooting Brake-ის სერიულ წარმოებას გეგმავს

მოდიფიცირებულ და გადაკეთებულ Porsche-ებზე მოთხოვნა არასდროს იკლებს, ავტომობილების ტუნინგ-ატელიეები კი სიამოვნებით აგრძელებენ ამ მოთხოვნის დაკმაყოფილებას. ბოლო სიახლე პოლონური კომპანია Indecent-ისგან მოდის — მათ ჩათვალეს, რომ 911-ს უფრო გრძელი სახურავი მოუხდებოდა და კუპეს Shooting Brake-ად გადაკეთებას შეუდგნენ.

ასევე იხილეთ: Porsche-ს შემაშფოთებელი ისტორია და აქამდე უცნობი ფაქტები

ყველაფერი რენდერით დაიწყო, რომელიც კომპანიამ სოციალურ ქსელებში გამოაქვეყნა. სურათზე ნაჩვენები იყო 991.2 თაობის მოდელი, შეცვლილი სახურავის ხაზითა და უკანა ნაწილით, რომლის სილუეტიც ძალიან ჰგავს დაპატარავებულ Panamera Sport Turismo-ს. იერსახეს აგრესიული, გაფართოებული უკანა ფრთები, არაქარხნული დისკები, ნარინჯისფერი სპეც-საღებავი და ორმაგი უკანა სპოილერი ასრულებს.

ინტერნეტში გამოხმაურება იმდენად მასშტაბური აღმოჩნდა, რომ პროექტი „რა იქნებოდა, რომ...“ ფაზას მალევე გასცდა. Indecent-მა მწვანე შუქი აანთო და პროტოტიპზე მუშაობაც დაწყებულია, მალე კი სერიულ წარმოებას ვიხილავთ. საინტერესოა, რომ ეს უბრალო საჩვენებელი მოდელი არ არის — ის კონკრეტულმა კლიენტმა უკვე შეუკვეთა. აუმჯობესებს თუ არა Shooting Brake ვერსია ორიგინალ 911-ის დიზაინს, ეს გემოვნების საკითხია, თუმცა ვიღაცამ ამის გასაგებად სოლიდური თანხა უკვე გადაიხადა.

ტექნიკური გამოწვევები და პრაქტიკულობა

911-ის shooting brake-ად ქცევა იოლი საქმე არ არის, რადგან ეს ძარაზე სერიოზულ მოდიფიკაციებს მოითხოვს. თუმცა, საბოლოო შედეგი სრულიად უნიკალური და სტანდარტულ კუპეზე ბევრად პრაქტიკული იქნება. უკანა მგზავრებისთვის თავის ზემოთ სივრცე გაიზრდება, ხოლო ბარგისთვის გაცილებით მეტი ადგილი გაჩნდება.

თუმცა, არსებობს ერთი სირთულე. ძრავი, როგორც ყოველთვის, ავტომობილის უკანა ნაწილშია განთავსებული. შესაბამისად, გუნდმა უნდა გადაჭრას გაგრილების პრობლემა, რადგან ძრავის ტრადიციული, სავენტილაციო ჭრილებიანი საფარი ადგილს სპეციალურად დამზადებულ საბარგულის კარს უთმობს.

პირველი ეგზემპლარი 991.2 თაობის 911 Turbo-ს ბაზაზე აიგება, რომელიც 3.8-ლიტრიანი Twin-Turbo ოპოზიტური ექვსცილინდრიანი ძრავითაა აჭურვილი (533 ცხ.ძ.). პროექტის დასრულებას მთელი წელი დასჭირდება და Indecent გეგმავს, მზა ავტომობილი 2027 წლის გუდვუდის ფესტივალზე წარადგინოს.

კომპანიამ გაგვიმხილა, რომ ყოველი მომდევნო ავტომობილის აწყობას 4 თვემდე დასჭირდება და დონორად შესაძლოა გამოყენებულ იქნას Turbo, Turbo S, ან თუნდაც ექსტრემალური GT2 RS. ფასი საკმაოდ სოლიდურია — დაახლოებით $350 000, და ეს მხოლოდ გადაკეთების ღირებულებაა (დონორი ავტომობილის ფასის გაუთვალისწინებლად).