Nissan 240SX-ი რომლის განადგურებაც დრიფტერებმა ვერ მოასწრეს, აუქციონზე იყიდება

სცადეთ იპოვოთ Nissan-ის ლეგენდარული S-შასი, რომელსაც ბოლო სამი ათწლეული ტანჯვაში, დრიფტსა და მრავალჯერად გადადუღება-გადაკერებაში არ გაუტარებია. ახლა კი სცადეთ და მიზნად ამავე მოდელის მიზერული გარბენით პოვნა დაისახეთ. აუქციონზე გასაყიდად გამოტანილი ეს 1996 წლის 240SX სწორედ ის იშვიათი გადარჩენილი ეგზემპლარია, რომელიც ორივე გამოწვევას წარმატებით შეასრულებს და, შესაძლოა, იმის უფლებაც ჰქონდეს, რომ თავი პლანეტაზე საუკეთესოდ შემონახულ ნიმუშთა შორისაც წარმოიდგინოს.

ასევე იხილეთ:  როგორ გაიქცა იაპონიის ციხიდან Nissan-ის გადამრჩენელი ბოსი? 

240SX-ის ეს თაობა, რომელსაც ავტოსამყარო S14-ის სახელითაც იცნობს, თავის დროზე სხვადასხვა კონფიგურაციით იწარმოებოდა. კონკრეტულად ეს მოდელი შედარებით დაბალი კომპლექტაციის SE ვერსიაა. ეს ნიშნავს, რომ მას აკლია ის 2.0-ლიტრიანი ტურბოძრავიანი SR20, რომლითაც ეს ავტომობილი ასე განთქმულია, და მის ნაცვლად თავს 2.4-ლიტრიანი ატმოსფერული ოთხცილინდრიანი აგრეგატით იწონებს. ქარხნიდან გამოსვლისას ეს ძრავა 155 ცხენის ძალასა და 217 ნიუტონ-მეტრ მაბრუნ მომენტს გამოიმუშავებდა და უკანა თვლებს ხუთსიჩქარიანი მექანიკური გადაცემათა კოლოფის საშუალებით აბრუნებდა.

ამ 240SX-ის მთავარი ხიბლი და ფასეულობა იმაში მდგომარეობს, რომ მას სულ რაღაც 9 500 მილზე (დაახლოებით 15 288 კმ) ნაკლები აქვს გავლილი, რაც, დიდი ალბათობით, მას ამერიკაში ყველაზე მცირე გარბენის მქონე ეგზემპლარად აქცევს. გარდა იმისა, რომ ავტომობილით საოცრად ცოტა უმგზავრიათ, მას არც რაიმე სერიოზული მექანიკური მოდიფიკაცია შეხებია. თუმცა, როგორც Cars & Bids-ის სააუქციონო განაცხადშია აღნიშნული, მანქანა მაინც არ არის სრულიად ქარხნულ მდგომარეობაში.

ამჟამად ის Koni-ს ამორტიზატორებსა და Eibach-ის დადაბლებულ ზამბარებზე დგას, აქვს არაორიგინალი მაყუჩი და ახალი უკანა სტაბილიზატორი. ძრავის განყოფილებაში მხოლოდ არაორიგინალი ჰაერის შემშვები სისტემაა დამატებული, სხვა მხრივ კი ძრავა ხელუხლებელია. 

ზოგადად, ავტომობილი უზადო, გამორჩეულ მდგომარეობაშია, თუმცა პოტენციურმა მყიდველებმა უნდა გაითვალისწინონ, რომ გვერდითა ზღურბლები და უკანა დამატებები ძარაზე ღია ხრახნებითაა დამაგრებული. თუ ახალ მფლობელს მანქანის სრულ ქარხნულ იერსახეში დაბრუნება მოუნდება, ამ ხვრელების ამოვსება და კორპუსის გადაღებვა მოუწევს.

რაც შეეხება სალონს, აქაურობა აბსოლუტურად ხელუხლებელია, თუ არ ჩავთვლით თანამედროვე მულტიმედიის სისტემას Apple CarPlay-ის მხარდაჭერით. კუპეს ახლახან კერამიკული დამცავი ფენაც გადააკრეს, ასე რომ, მისი ალისფერი წითელი კიდევ მრავალი წლის განმავლობაში იკაშკაშებს.

დღემდე გადარჩენილი S14-ების უმეტესობამ ათი მფლობელი, სამი ძრავის ცვლილება და მინიმუმ ერთი საეჭვო დადაბლების გადაწყვეტილება მაინც გამოიარა. ამ SE მოდელმა კი ყოველივე ამას გვერდი აუარა. ასე რომ, თუ დაინტერესდით, იჩქარეთ და განათავსეთ თქვენი ფსონი მანამ, სანამ ეს მანქანა რომელიმე დრიფტ-პროექტის მოყვარულის ხელში აღმოჩნდება.