Hyundai Tucson-ისა და Kia Sportage-ის „სამოქალაქო ომს“ ერთი გამარჯვებული ჰყავს

ბოლო რამდენიმე წლის განმავლობაში სამხრეთკორეული ავტომწარმოებლების საოცარი აღზევება ამ ქვეყნის ეკონომიკური სასწაულივით შთამბეჭდავია. Hyundai და Kia აშშ-ის გაყიდვების სტატისტიკებში დომინირებას განაგრძობენ. იმის ფონზე, რომ მათი საწარმოო ხაზის სათავეში პოპულარული ჰიბრიდული ძრავები დგას, გასაკვირი არ არის, რომ მომხმარებლები საოჯახო ავტომობილად სწორედ ამ ბრენდების მოდელებს ირჩევენ. კომპაქტური ქროსოვერების სეგმენტში მათი ორი ყველაზე პოპულარული მოდელი — Tucson-ი და Sportage-ი — საერთო პლატფორმას იზიარებენ, თუმცა გაყიდვების კუთხით მათ შორის გამარჯვებული აშკარაა.

Sportage-ი Kia-ს ყველაზე გაყიდვადი ავტომობილია და ბრენდის მეორე ყველაზე წარმატებული მოდელი — K4 მას მნიშვნელოვნად ჩამორჩება. მხოლოდ სექტემბერში კომპანიამ ამ ქროსოვერის 16 033 ერთეულის რეალიზება შეძლო, რაც გასული წლის იმავე პერიოდთან შედარებით 10%-იან ზრდას წარმოადგენს. წლის დასაწყისიდან დღემდე კი გაყიდვები 2025 წელთან შედარებით 9%-ით გაიზარდა და 145 746 მიწოდებულ ერთეულს მიაღწია. 

ამ მკვეთრ ზრდას რამდენიმე მიზეზი აქვს, თუმცა მთავარი მაინც 2026 წელს წარდგენილი რესტაილინგია. განახლებამ გაუმჯობესებული ელექტროძრავის ხარჯზე ჰიბრიდული მოდელების სიმძლავრე გაზარდა. ასევე, სრულიად განახლდა წინა მხარე და ახლა უფრო მოხდენილია.

თუმცა Hyundai Tucson კიდევ უფრო წარმატებულია... მიუხედავად იმისა, რომ მომავალი თაობის Hyundai Tucson-ი უკვე კარს მოგვადგა, მყიდველები მიმდინარე თაობის მოდელითაც აბსოლუტურად კმაყოფილნი არიან. ეს კომპაქტური ქროსოვერი კვლავ ბრენდის საწარმოო ხაზის ყველაზე პოპულარული ავტომობილია, რომელსაც Elantra საკმაოდ დიდი მანძილით ჩამორჩება.

სექტემბერში 23 164-მა Tucson-მა იპოვა ახალი მფლობელი, რაც გასული წლის ანალოგიურ პერიოდთან შედარებით 32%-იან ზრდას ნიშნავს. წლის განმავლობაში კი 181 687 Tucson-ი გაიყიდა, რაც გასულ წელთან შედარებით 10%-ით მეტია. მიუხედავად იმისა, რომ ის Sportage-ის პლატფორმას იზიარებს, Tucson-ის დიზაინი ამერიკელ მძღოლებს უფრო მოსწონთ.

რა იმალება Tucson-ის ასეთი წარმატების უკან? Hyundai მომხმარებელს 3 წლიან ან 36 000-მილიან უფასო ტექნიკურ მომსახურებას სთავაზობს — რასაც Kia საერთოდ არ ითვალისწინებს. მიუხედავად იმისა, რომ Sportage-ის საწყისი ფასი Tucson-ზე $1000-ით ნაკლებია, მყიდველები მაინც უყურებენ დამატებით ბონუსებს, რომლებსაც მწარმოებელი მათ საცალო ფასის მიღმა სთავაზობს. ასევე, CarEdge-ის მონაცემებით, Hyundai Tucson-ი დროსთან ერთად ღირებულებას უფრო ნაკლებად კარგავს. 5 წლის შემდეგ ის საწყისი ფასის 45%-ს კარგავს, ხოლო Sportage — 47%-ს.

მალე ბაზარზე ახალი თაობის Tucson-ი შემოვა. Hyundai გეგმავს ქროსოვერი კიდევ უფრო სრულყოფილი გახადოს — მისცეს მას სრულიად ახალი, უფრო კუთხოვანი და მკაცრი იერი, ხოლო სალონში მეტი ფიზიკური ღილაკი დააბრუნოს.