ძველი ალპინა სხვა სახელით დაბრუნდა — იხილეთ Bovensiepen 05 GT
ეს Bovensiepen 05 GT-ია — ერთი შეხედვით, გრანდიოზული, მძიმე, ხუთკარიანი ჰიბრიდული V8 უნივერსალი ასტრონომიული სიმძლავრითა და ესთეტიკით, რომელიც იმ კაცის ხელითაა გამოძერწილი, ვისაც წარსულში პლანეტის ყველაზე მძლავრი ბრიტანული ჰიპერქარები დაუხატავს.
მოკლედ, ვინც იცის, იცის... მათთვის კი, ვინც ამ სამყაროს ახლა ეცნობა — ეს იმ ოჯახის ნამუშევარია, რომელმაც თავის დროზე ლეგენდარული Alpina დააფუძნა. რა თქმა უნდა, საქმე ეხება მოდიფიცირებულ BMW M5 Touring-ს, თუმცა ოსტატები იმდენად თავშეკავებულები არიან, რომ მიუნხენის ამ ჰიბრიდულ ლევიათანს სახელით საერთოდ არ მოიხსენიებენ.
ეს ვიზუალი კი იმიტომაა შთამბეჭდავი, რომ... ის კლასიკურ Alpina-ს ჰგავს. იმ ნამდვილ, ძველ Alpina-ს და არა BMW-ს ამჟამინდელ, ულტრა-მდიდრულ რეინკარნაციას. სტეფენსონმა ავტომობილს მძლავრი წინა გრილი და სრულიად ახალი წინა ბამპერი აჩუქა, რომლის ხაზიც შემდგომ მთელ ძარას ქვედა ნაწილში მიყვება. უკანა მხარეს კი „ოთხლულიანი“ გამოსაბოლქვი სისტემა და საბარგულზე დამაგრებული დახვეწილი სპოილერი აგვირგვინებს.
და, რა თქმა უნდა, დისკები — 21-დუიმიანი მსუბუქი ჭედური შედევრები, რომლებიც თავიანთი სიმეტრიული დიზაინით სრულყოფილების იდეას ასხივებენ. აბა, სხვაგვარად როგორ უნდა ჩაწვდეთ მათ უნიკალურობას? ეს დისკები სპეციალურად ამ მოდელისთვის შექმნილ Pirelli-ს საბურავებშია შემოსილი, ხოლო ხსენებული გამოსაბოლქვი Akrapovič-ის ტიტანის სისტემაა, რომელიც ქარხნულზე 7.8 კილოგრამით მსუბუქია.
Bovensiepen-ის ქარხნული მონაცემებით, ავტომობილი 789 ცხენის ძალასა და 1100 ნიუტონ-მეტრ მაბრუნ მომენტს გამოიმუშავებს. ეს კი საგრძნობი მატებაა სტანდარტული 4.4-ლიტრიანი V8 M5 Touring-ის 727 ცხენის ძალასა და 1000 ნიუტონ-მეტრთან შედარებით. 0-დან 100 კმ/სთ-მდე აჩქარების დრო 3.6 წამზე ნაკლებს შეადგენს (ისევე როგორც BMW-ს შემთხვევაში), თუმცა 305 კმ/სთ-იანი მაქსიმალური სიჩქარე ქარხნულ ლიმიტს ბევრად აღემატება.
წონა? ზუსტად იგივე — 2 555 კგ. და ეს იმის გათვალისწინებით, რომ ავტომობილს მოყვება კომპანიის უძვირფასესი ინტერიერი, სადაც მდიდრული ტყავისა და პერსონალიზაციის უსაზღვრო შესაძლებლობები გეძლევათ. საბარგული, რომელიც მთლიანად ალკანტარითაა მოპირკეთებული? პერსონალური დამღები სავარძლებზე? დახვეწილი, ხელით შესრულებული ექსკლუზიური ქარგვა? — თქვენგან მხოლოდ თავის დაქნევაა საჭირო...
თითოეული მოდელის ღირებულება გერმანიაში თითქმის €200 000-დან დაიწყება. ძველი Alpina-ს მოდელები ყოველთვის იყო მანქანები მათთვის, ვინც შინაარსს ხვდებოდა და აფასებდა. ვინაიდან ეს Bovensiepen-ი კიდევ უფრო ვიწრო სეგმენტზეა გათვლილი და ნიშურია, ეს მას კიდევ უფრო მიმზიდველსა და განსაკუთრებულს ხდის.
