Tesla საცხოვრებელ სახლს დაეჯახა და 76 წლის ქალი იმსხვერპლა — გამოძიება
ამერიკის საავტომობილო გზების უსაფრთხოების ეროვნულმა ადმინისტრაციამ (NHTSA) სპეციალური გამოძიება დაიწყო ტეხასის შტატის ქალაქ ქეითიში მომხდარ ტრაგიკულ ავარიაზე, რომლის დროსაც Tesla Model 3 საცხოვრებელ სახლს შეეჯახა და 76 წლის მარტა ავილას სიცოცხლე იმსხვერპლა.
ასევე იხილეთ: რამდენად უსაფრთხოა ელექტრო ავტომობილები?
ჰარისის ოლქის სამართალდამცველების განცხადებით, მძღოლი, მაიკლ ბატლერი, ადგილზევე თანამშრომლობდა გამოძიებასთან. მისი მტკიცებით, ავტომობილი ზოლიდან მაშინ გადავიდა და შევარდა სახლში, როდესაც ჩართული ჰქონდა Tesla-ს ნაწილობრივ ავტომატიზებული მართვის სისტემა.
ილონ მასკი და კომპანიის ხელმძღვანელობა თავდაცვის რეჟიმშია
კომპანიის გენერალური დირექტორი სოციალურ ქსელ X-ში გამოქვეყნებული პოსტით თავდაცვაზე გადავიდა და განაცხადა, რომ მომხდარი „ყოველგვარ აზრსაა მოკლებული“. მასკმა აღნიშნა, რომ FSD (Full Self-Driving) უბნების შიდა ქუჩებზე ნელა გადაადგილდება, ეს კი მაღალი სიჩქარის შეჯახება იყო.
მიუხედავად ხმამაღალი დასახელებისა, Tesla თავისი Model 3-ის მფლობელის სახელმძღვანელოში მკაფიოდ აფრთხილებს მძღოლებს, რომ სისტემა მუდმივ ყურადღებას და ნებისმიერ წამს მართვის საკუთარ თავზე აღებას მოითხოვს.
საკითხს გამოეხმაურა Tesla-ს ავტოპილოტის განყოფილების ვიცე-პრეზიდენტი აშოკ ელუსვამიც. მისი თქმით, შიდა მონაცემებით, მძღოლმა თავად გააუქმა ავტოპილოტის რეჟიმი, როდესაც საცხოვრებელ ზონაში აქსელერატორს ბოლომდე ჩააჭირა. ელუსვამიმ აღნიშნა, რომ შეჯახების მომენტში ავტომობილის სიჩქარე საათში 73 მილს (117 კმ/სთ) აღწევდა და მძღოლი პედალს ავარიის შემდეგაც კი არ უშვებდა.
მონაცემთა გამჭვირვალობის პრობლემა და იურიდიული წნეხი
მძღოლისა და ტესლას ტოპ-მენეჯერების ურთიერთგამომრიცხავი განცხადებები ამ ეტაპზე დამოუკიდებლად გადამოწმებული არ არის. გამოცემა The Washington Post აქამდეც წერდა, რომ კომპანიას აქვს ისტორია, როდესაც მძიმე ავარიების დროს ელექტრონული მონაცემების მოპოვებას ადვოკატებისა და დაინტერესებული მხარეებისთვის მიზანმიმართულად ართულებდა ან მალავდა.
Yes, this makes no sense. FSD drives slowly through neighborhood streets and this was a high speed crash!
— Elon Musk (@elonmusk) June 22, 2026
კალიფორნიის სასამართლომ და სატრანსპორტო დეპარტამენტმა (DMV) იურიდიული წნეხის შედეგად Tesla-ს მარკეტინგული კამპანია მომხმარებლის შეცდომაში შეყვანად მიიჩნიეს. სწორედ ამიტომ, თებერვალში კომპანიამ იძულებით შეცვალა აშშ-ში სტანდარტული Autopilot-ის დასახელება.
სტატისტიკა აჩვენებს, რომ 2016 წლიდან დღემდე, NHTSA-მ სამ ათეულზე მეტი სპეციალური გამოძიება დაიწყო Tesla-ს მოწინავე ასისტენტების მონაწილეობით მომხდარ ავარიებზე. დამოუკიდებელი პლატფორმა TeslaDeaths.com-ის მონაცემებით, 2013-დან 2025 წლამდე პერიოდში დაფიქსირდა სულ მცირე 65 ფატალური შემთხვევა, სადაც ავტოპილოტი ან FSD სისტემები ფიგურირებდა.
ფედერალური გამოძიების ახალი ტალღა კომპანიისთვის საკმაოდ სენსიტიურ დროს დაემთხვა, რადგან ილონ მასკი აქტიურად ცდილობს ინვესტორების დარწმუნებას, რომ ტესლა მალე რობოტაქსების გლობალურ ფლოტს გაუშვებს ამერიკის გზებზე. მიუხედავად მორიგი საგამოძიებო სკანდალისა, ორშაბათს კომპანიის აქციები ბირჟაზე 1 პუნქტით გაიზარდა და $405.05-ზე დაიხურა.
