რა მანქანა იყიდა დენიელ რედკლიფმა „ჰარი პოტერში“ 27.5 მილიონის აღების შემდეგ?

ჰოლივუდის მულტიმილიონერი ვარსკვლავებისგან განსხვავებით, რომელთა ავტოფარეხებიც პირველივე დიდ ჰონორარზე ეგზოტიკური ჰიპერქარებით ივსება, დანიელ რედკლიფმა18 წლის ასაკში ანტი-ჰოლივუდური ნაბიჯი გადადგა. 27.5 მილიონი დოლარის ფლობის მიუხედავად, მისი არჩევანი იტალიურ ბიუჯეტურ ჰეჩბეკზე, Fiat Grande Punto-ზე შეჩერდა.

როდესაც დანიელ რედკლიფს 18 წელი შეუსრულდა, მან „ჰარი პოტერის“ ფრენჩაიზიდან გამომუშავებული, გავრცელებული ინფორმაციით 27.5-მილიონიანი ჩეკი გაანაღდა და ყველაზე ნაკლებად მოსალოდნელი ავტომობილი იყიდა. მოზარდების უმეტესობას ბანკში მილიონებზე მხოლოდ ოცნება შეუძლია და მოდით რეალობას თვალი გავუსწოროთ — ასეთი შესაძლებლობის არსებობისას, ბევრი მათგანი ფულს რამე ძალიან თვალშისაცემსა და ძვირადღირებულში დახარჯავდა. თუმცა, რედკლიფის შემთხვევაში ყველაფერი სულ სხვაგვარად წარიმართა.

2007 წლის ივლისში, როდესაც მსახიობი სრულწლოვანი გახდა, ფონდი, სადაც მისი ჰონორარები ინახებოდა, ოფიციალურად მის განკარგულებაში გადავიდა. დიდების პიკზე მყოფ თინეიჯერს ძალიან მარტივად შეეძლო თავი დაეკარგა ამხელა კაპიტალით, თავისი მფრინავი ცოცხი, „ნიმბუს 2000“, Rolls-Royce-ზე ან Ferrari-ზე გადაეცვალა და გიჟურ ხარჯვაში გადაშვებულიყო. მაგრამ, ისევე როგორც მისი პოსტ-პოტერიადული, არასტანდარტული კინოროლები, საავტომობილო არჩევანიც უცნაური აღმოჩნდა: ის პირდაპირ Fiat-ის დილერთან მივიდა და ბიუჯეტური Grande Punto შეიძინა.

„Fiat Punto არის მანქანა, რომელიც ძალიან მიყვარს. გარდა ამისა, ის ბრიტანეთში ყველაზე ნაკლებად დამაბინძურებელ ხუთ ავტომობილს შორის შედის. არის პატარა, მანევრული და სიმპათიური. მე ბევრად მირჩევნია ასეთი დაბალი გამონაბოლქვის მქონე მანქანები ტრაბახა მოდელებს. არ ვფიქრობ, რომ მფლანგველი ვარ. უბრალოდ ისეთი წვრილმანების ყიდვა მიყვარს, როგორიცაა წიგნები, კომპაქტ-დისკები და DVD-ები“, — ხსნიდა რედკლიფი.

ამ შენაძენისთვის დანიელს გრინგოტსის ჯადოსნური ბანკის საცავების დაცარიელება ნამდვილად არ დასჭირვებია, რადგან მანქანა სულ რაღაც 5 000 დოლარი დაჯდა. ამასთანავე, ასეთი მოკრძალებული ტრანსპორტი მას ეხმარებოდა ზედმეტი ყურადღება არ მიექცია, პაპარაცებისგან თავი დაეცვა და ლონდონში აბსოლუტურად მშვიდად, ანონიმურად გადაადგილებულიყო.

წლების მატებასთან ერთად, მსახიობის გემოვნება და ბიუჯეტი საგრძნობლად გაიზარდა — დღეს მის ფარეხში უკვე ფიგურირებს ისეთი ბრენდები, როგორიცაა Range Rover, BMW და სუპერქარი Lamborghini Huracán. რედკლიფის გემოვნება მაინც რადიკალურად განსხვავდება მისი ჰოგვორტსელი მეგობრის, რუპერტ გრინტისგან (რონ უისლი), რომლის ოცნების ტრანსპორტიც უკიდურესად ექსცენტრული აღმოჩნდა — მან ნაყინის ფურგონი იყიდა.

რომელი უფრო შთამბეჭდავი გადაწყვეტილებაა: 27 მილიონის პატრონისგან ეკოლოგიური Fiat Punto-ს ყიდვა, თუ ნაყინის ნამდვილი ფურგონით ქალაქში სეირნობა, როგორც ეს რუპერტ გრინტმა გააკეთა?