ავსტრალიის პოლიციამ გზებზე ახალი „ჩრდილოვანი“ საპატრულო მანქანები გაიყვანა

სამხრეთ ავსტრალიის პოლიციამ ამერიკელი კოლეგების გამოცდილება გაიზიარა და გზებზე ახალი, ე.წ. „ჩრდილოვანი საპატრულო მანქანები“ გაიყვანა. ეს ავტომობილები მოჩვენებებს ჰგვანან — ისინი ჩვეულებრივ მარკირებულ პატრულსა და სრულიად ფარულ, სამოქალაქო მანქანებს შორის შუალედურ ვარიანტს წარმოადგენენ. მათი მთავარი მიზანი იმ მძღოლების გამოჭერაა, რომლებიც წესებს მხოლოდ მაშინ იცავენ, როდესაც ხედავენ, რომ მათ პოლიცია აკვირდება.

პოლიციის კომისარმა გრანტ სტივენსმა პრესკონფერენციაზე ღიად აღიარა, რომ ეს კონცეფცია ამერიკელი კოლეგებისგან გადაიღეს. აშშ-ის გამოცდილებამ აჩვენა, რომ შეუმჩნეველი გრაფიკით გაფორმებული მანქანები შესანიშნავად უმკლავდებიან მანევრებსა და აგრესიულ მძღოლებს და აიძულებენ მათ, სიჩქარეს არ გადააჭარბონ.

როგორ მუშაობს საავტომობილო „სტელსი“?

საპილოტე პროგრამა ამ ეტაპზე 6 ავტომობილს მოიცავს: 2 ერთეულ Subaru Outback-ს, 2 ერთეულ Toyota Kluger-სა (აშშ-სა და საქართველოში ცნობილი, როგორც Highlander) და 2 ერთეულ Land Cruiser 300-ს.

თითოეულ მათგანს აქვს ძარის ფერში გადაწყვეტილი ვინილის გრაფიკა, რომელიც მზიან ამინდში პრაქტიკულად შეუმჩნეველია და ჩვეულებრივი სამოქალაქო მანქანის შთაბეჭდილებას ტოვებს. თუმცა, როგორც კი ღამით მათ შუქის წყარო (მაგალითად, სხვა მანქანის ფარები) მოხვდება, სპეციალური ამრეკლავი ვინილი მომენტალურად იწყებს ნათებას და პოლიციის სრულ მარკირებას ააშკარავებს.

შენიღბვის კიდევ უფრო გასაძლიერებლად, ამ მოდელებს არ აქვთ სახურავზე დამონტაჟებული ტრადიციული ციმციმები. ნაცვლად ამისა, პატარა შუქდიოდები რადიატორის გისოსებში და საქარე მინის მიღმაა დამალული. მიუხედავად ფარული ვიზუალისა, ეს ავტომობილები სრულად სტანდარტული პატრულივითაა აღჭურვილი. მათ აქვთ სიჩქარის მზომი ულტრათანამედროვე რადარები, ალკოჰოლისა და ნარკოტიკების სწრაფი ტესტირების მობილური აპარატურა და საგზაო შემთხვევების გამოსაძიებელი სპეციალური აღჭურვილობა.

ჩრდილოვანი ავტოპარკი გზებზე დაუყოვნებლივ გავა და გადანაწილდება როგორც რეგიონალურ მაგისტრალებზე, ისე გადატვირთულ საქალაქო ზონებში. ადგილობრივი ხელისუფლება იმედოვნებს, რომ ეს ნაბიჯი საგრძნობლად შეამცირებს ნასვამ მდგომარეობაში მართვისა და გზებზე გრესიული ქცევის შემთხვევებს.