Subaru-ში ნამდვილი სპორტქარების შესაქმნელად ახალი განყოფილება შეიქმნა

წლების განმავლობაში სუბარუს ენთუზიასტები აკვირდებოდნენ, თუ როგორ შორდებოდა ავტომწარმოებელი იმ ფორმულას, რომელმაც ის დღევანდელობამდე მოიყვანა. STI წარსულს ჩაბარდა, WRX თანდათან უფრო სერიოზულ (და ნაკლებად აზარტულ) სპორტულ სედანად იქცა, ხოლო საინტერესო პროტოტიპებმა, რომლებიც ხშირად ხვდებოდა სათაურებში, საბოლოოდ მომხმარებლისთვის რეალური შედეგი ვერ მოიტანა. ახლა კი Subaru-ში აღიარებენ, რომ რაღაცები უნდა შეიცვალოს — ბრენდი სრულიად ახალ განყოფილებას აფუძნებს, რომლის მიზანიც იმის უზრუნველყოფაა, რომ სახალისო ავტომობილები წარსულს არ ჩაბარდეს.

ასევე იხილეთ: ცუნამს გადარჩენილი ლურჯი Subaru - ავტოპორტრეტი

იაპონური გამოცემა BestCar-ის ანგარიშის თანახმად, ავტომწარმოებელმა ახლახან „პროდუქტების ინოვაციების შტაბ-ბინა“ შექმნა. მის შემადგენლობაში კი ფუნქციონირებას იწყებს „სპორტული ავტომობილების დაგეგმარების ოფისი“, რომლის ერთადერთი ამოცანა სუბარუსთვის ძველი აზარტისა და სიამოვნების დაბრუნებაა. ეს განცხადება ავტომწარმოებლის მთავარ ტექნიკურ დირექტორთან, ტეცურო ფუჯინუკისთან ინტერვიუს დროს გაჟღერდა. მან მკაფიოდ აღნიშნა, რომ კომპანიას ძველი სტილის განვითარების პროცესის დასრულება სურს. „ჩვენ გადავწყვიტეთ, რომ ძველი მეთოდით აღარ ვიმუშაოთ, — განაცხადა ფუჯინუკიმ. — რადგან ეს მოსაწყენია“.

ეს საკმაოდ გულწრფელი აღიარებაა კომპანიისგან, რომლის სპორტული ხაზი ადგილზე დგას, მაშინ როცა კონკურენტები წინსვლას აგრძელებენ. სუბარუს რეპუტაცია რალიდან შთაგონებულმა ლეგენდებმა შექმნეს, როგორებიც WRX STI, Legacy GT, Forester XT და სხვა ტურბინიანი, სრულამძრავიანი პერფორმანს-მანქანები იყვნენ. მიუხედავად ამისა, გასული ათწლეულის განმავლობაში ბრენდის ავტომოყვარულებზე ორიენტირებული მიმართულება თანდათან შესუსტდა და გაუფერულდა.

ალბათ, არაფერი ასახავს ამ სტაგნაციას ისე კარგად, როგორც თავად STI. ამერიკული ბაზრისთვის განკუთვნილი ბოლო WRX STI 310 ცხენის ძალას ავითარებდა — ეს მხოლოდ 10 ცხენის ძალით მეტია იმ 300-იან მოდელზე, რომელიც ამერიკაში ჯერ კიდევ 2004 წელს გამოჩნდა. იმის ნაცვლად, რომ მუდმივად განვითარებად ფლაგმანად დარჩენილიყო, STI 2021 წლის მოდელების შემდეგ უბრალოდ გაქრა და გააჩინა კითხვები იმის შესახებ, ადარდებდა თუ არა სუბარუს საერთოდ პერფორმანსი.

ფუჯინუკის თქმით, მკაცრმა ეკოლოგიურმა და საწვავის ეკონომიის რეგულაციებმა უფრო მძლავრი ბენზინის ძრავების გამოშვება გაართულა. თუმცა, იმავე რეგულაციებმა ხელი ვერ შეუშალა ისეთი მანქანების გამოჩენას, როგორიცაა Toyota GR Corolla, Honda Civic Type-R და Hyundai Elantra N — შესაბამისად, ეს უფრო გამართლებას ჰგავს, ვიდრე ადეკვატურ მიზეზს.

ახალი დეპარტამენტის შექმნა ავტომატურად არ ნიშნავს იმას, რომ სუბარუს სპორტული ავტომობილებისთვის ახალი ოქროს ხანა დადგება. ავტომოყვარულებმა წლები დახარჯეს იმის ყურებაში, თუ როგორ ჩნდებოდნენ და ქრებოდნენ საინტერესო კონცეპტები ისე, რომ დილერების შოურუმებამდე არასდროს მიუღწევიათ. მიუხედავად ამისა, სპორტული მანქანებისთვის გამოყოფილი მთლიანი ოფისის დაარსება ბევრად უფრო მნიშვნელოვანი ნაბიჯია, ვიდრე ავტოშოუზე გამოფენილი კიდევ ერთი მორიგი პრიალა პროტოტიპი.