$8 000-ად იყიდება BMW E46, რომელიც Ford Mustang-ად გადაქცევას ცდილობდა

BMW-ს მესამე სერიის E46 თაობა წლების განმავლობაში ერთ-ერთ ყველაზე ელეგანტურად დაძველებულ მოდელად მიიჩნევა. სწორედ ამიტომ, მისი მოდიფიცირება ყოველთვის სარისკო გადაწყვეტილებაა. თუმცა მაინც არიან ადამიანები, რომლებიც მზად არიან, მსგავსი რისკი საკუთარ თავზე აიღონ და ნიდერლანდებში გასაყიდად გამოტანილი მოდელი სწორედ ამის დასტურია.

ნიდერლანდებში გასაყიდად BMW 318Ci-ია გამოტანილი, რომელზეც შესაძლოა იმის თქმაც გაგიჭირდეთ, რომ რეალურად გერმანული ავტომწარმოებლის პროექტია. საბოლოოდ კი, ეს ავტომობილი საკმაოდ უცნაურ ქმნილებად იქცა, რომელიც, როგორც ჩანს, Ford Mustang-ის მიბაძვას ცდილობს.

ყველაზე უცნაური ამ ავტომობილში წინა ნაწილია. მრგვალი მაშუქები და დიდი ცენტრალური ცხაური აშკარად ამერიკული „პონი-ქარის“ სტილის იმიტაციის მცდელობაზე მიუთითებს. თუმცა ამ მცდელობის მიუხედავადაც, საბოლოო შედეგი Mustang-ს დიდად მაინც არ ჰგავს. განსაკუთრებით უცნაურად გამოიყურება კაპოტის ცენტრალური ნაწილი, რომელიც ცხაურის ზემოთ, წინა მხარეს არის ამოწეული.

გვერდითა მხრიდან ავტომობილს მასიური, არასტანდარტული წინა და უკანა მაშუქები აქვს, რომლებიც E46-ის ქარხნულ დიზაინს სრულად ცვლის. კარების ქვედა ნაწილს ვერცხლისფერი ზოლიც გასდევს. არც უკანა ნაწილი გამოიყურება უკეთესად — მოდიფიცირებულ BMW-ს Mustang-ის სტილში შექმნილი უკანა მაშუქები აქვს. საბედნიეროდ, ინტერიერი პრაქტიკულად უცვლელია. მასში შენარჩუნებულია E46-ის ქარხნული საჭე, ციფრული ინსტრუმენტების პანელი და 5-სიჩქარიანი მექანიკური გადაცემათა კოლოფი.

ეს უცნაური BMW ახლა ნიდერლანდებში იყიდება. ამ ეტაპისთვის ავტომობილს 235 019 კილომეტრი აქვს გავლილი, მისი ღირებულება კი 6 850 ევროა, რაც დაახლოებით $7 890-ია.