ჩინური ბრენდი ავსტრალიის მდიდრულ სეგმენტს იპყრობს — იხილეთ Hongqi-ს მოდელები

ჩინურმა ფუფუნების ავტომობილების ბრენდმა Hongqi-მ ოფიციალურად გამოაცხადა ავსტრალიის ბაზარზე შესვლისა და გლობალური ექსპანსიის ახალი ეტაპის შესახებ. კომპანია, რომელიც ჩინეთის უძველეს ავტომწარმოებელ FAW Group-ს ეკუთვნის და ისტორიულად ჩინეთის მაღალჩინოსნებისა და ლიდერების ავტომობილებს აწარმოებს, ავსტრალიურ ბაზარზე პრემიუმ სეგმენტში სერიოზულ მოთამაშედ ქცევას გეგმავს. 

ასევე იხილეთ: როგორ იგებს ჩინეთი ელექტრომობილების ომს?

ავსტრალიაში Hongqi-ს დებიუტი რამდენიმე ძირითადი მოდელით იგეგმება, რომლებიც მოიცავს როგორც სრულიად ელექტრო, ისე შიგაწვის ძრავით აღჭურვილ ქროსოვერებსა და სედანებსაც. ბრენდის ფლაგმანური მოდელი, ელექტრო-SUV — E-HS9, რომელსაც ხშირად ჩინურ Rolls-Royce-ს უწოდებენ, ავსტრალიური პრემიუმ-სეგმენტისთვის მთავარი შეთავაზება გახდება. ამას გარდა, ბაზარზე გამოჩნდება შედარებით კომპაქტური და ხელმისაწვდომი ქროსოვერებიც, რომლებიც გერმანულ პრემიუმ-ბრენდებთან (BMW, Mercedes-Benz, Audi) ფასითა და კომპლექტაციით შებრძოლებას შეეცდებიან.

Hongqi-ს წარმომადგენლების თქმით, ავსტრალია მათთვის სტრატეგიულად მნიშვნელოვანი „მარჯვენასაჭიანი“ ბაზარია, სადაც მოთხოვნა მაღალი კლასისა და ტექნოლოგიურად აღჭურვილ ავტომობილებზე სულ უფრო იზრდება. კომპანია გეგმავს ადგილობრივი სადილერო ქსელის გაფართოებას, სერვისცენტრების გახსნასა და მომხმარებლისთვის ხანგრძლივი საგარანტიო პირობების შეთავაზებას, რათა ახალ ბაზარზე ნდობა სწრაფად მოიპოვოს.

ავსტრალიაში გაყიდვების ოფიციალური დაწყება და მოდელების საბოლოო საფასო პოლიტიკა უახლოეს თვეებში გახდება ცნობილი, თუმცა Hongqi-ს გამოჩენა კიდევ ერთხელ უსვამს ხაზს ჩინური ავტოგიგანტების აგრესიულ გლობალურ ექსპანსიას ტრადიციულ დასავლურ ბაზრებზე.