კალიფორნიის ეროვნულ პარკებში მძღოლები მანქანებს ფუთავენ — მიზეზი ვირზაზუნაა
ავტომობილებსა და მღრღნელებს შორის დაუსრულებელი ომის ფრონტზე ახალი, საკმაოდ უცნაური ტენდენცია გამოჩნდა. კალიფორნიის ეროვნულ პარკებში ტურისტები იძულებულნი არიან, საკუთარი ავტომობილების ქვედა ნაწილი გიგანტური ბრეზენტებითა და ტენტებით შეფუთონ, რათა ადგილობრივმა მღრღნელებმა — ალპურმა ვირზაზუნებმა გაგრილების სისტემის მილები არ დაღრღნან.
სექვოიასა და კინგს-კანიონის ეროვნული პარკების რეინჯერები მძღოლებს ოფიციალურ რეკომენდაციასაც კი უწევენ: ტერიტორიაზე გაჩერებისას მანქანის ქვეშ გაშალონ დიდი ზომის ტენტი და ფსკერი მთლიანად შეფუთონ.
რატომ ეტანებიან მღრღნელები ანტიფრიზს?
პრობლემა იმაში მდგომარეობს, რომ ეთილენგლიკოლს, რომელსაც ძრავის გაგრილების სითხე (ანტიფრიზი) შეიცავს, ტკბილი სუნი და გემო აქვს. ეს სუნი წარმოუდგენლად მიმზიდველია მრავალი ცხოველისთვის (მათ შორის ძაღლებისთვისაც).
მთიან რეგიონებში ასვლისას ავტომობილის გაგრილების სისტემა ზღვრულად იტვირთება, რის გამოც მცირე გაჟონვის ან გაფართოების ავზიდან სითხის ორთქლის გამოყოფის შანსი იზრდება. ტკბილი სუნის იდენტიფიცირებისთანავე, ეს ცხოველები იწყებენ შლანგების ღრღნას, რათა სითხემდე მიაღწიონ.
View this post on Instagram
საუბედუროდ, ანტიფრიზის დალევა ცხოველებისთვის სასიკვდილოა (იწვევს თირკმელების სწრაფ უკმარისობას), ხოლო ავტომობილის მფლობელისთვის — დაზიანებულ გაგრილების სისტემასა და უდაბურ ადგილას გაფუჭებულ მანქანას ნიშნავს. თეორიულად, ვირზაზუნას თავისი ძლიერი ეშვებით ტენტის გაღრღნა არ გაუჭირდება, თუმცა დამცავი ბარიერი მაინც ეფექტურია — ის აკავებს ანტიფრიზის ორთქლსა და შესაძლო გაჟონვის წვეთებს, რის გამოც სუნი გარეთ ნაკლებად ვრცელდება. შესაბამისად, თუ მღრღნელი ტკბილ სუნს ვერ იგრძნობს, მას არც ავტომობილის სავალ ნაწილში ძრომის და მისი დაზიანების სურვილი გაუჩნდება.
აშშ-ის ეროვნული პარკების სამსახურს სპეციალური საინფორმაციო გვერდიც კი აქვს შექმნილი, სადაც დაწვრილებითაა ახსნილი, თუ როგორ უნდა შეფუთოთ ავტომობილი სწორად, რათა მოგზაურობა ავტომობილის დაუგეგმავი შეკეთების გარეშე დასრულდეს.
