Heuliez Intruder - ყველაფერი ერთ მანქანაში

ერთი წამით წარმოიდგინეთ ავტომობილი, რომელიც ოთხივე წამყვანია, მაღალი კლირენსი აქვს და ამავდროულად „როუდსტერია“ - რთული წარმოსადგენია ხომ?! თუმცა 1996 წელს ფრანგულმა კომპანიამ, რომლის სახელიც Heuliez-ია, მოახერხა და მსოფლიოს ყოვლისშემძლე ავტომობილი წარუდგინა. თქვენს წინაშე Heuliez Intruder-ია!

ეს ლამაზი ურჩხული ნამდვილად გასაოცარი მანქანაა. იგი Mercedes G Wagon 320-ის ბაზაზეა აწყობილი. მოგეხსენებათ, რომ G Wagon-ი მსოფლიოში საუკეთესო ყველგანმავალია, შესაბამისად Heuliez-იც იგივე აგრეგატებით სარგებლობს.

ძარას რაც შეეხება - Intruder-ი პირველი თაობის Mercedes SLK-ის სხეულს იყენებს. სახურავი შუშისგან აქვს დამზადებული და ელექტრონულად იკეცება. ძრავის ხუფი, წინა და უკანა ბამპერი კარბონისგანაა დამზადებული, მერსედესის დნმ-ს კი მის წინა ცხაურაშიც კი ამოიცნობთ.

Intruder-ის შეხედვისას რთულად წარმოსადგენია, რომ აღნიშნული პროტოტიპი 1996 წელს შეიქმნა, რადგან 2025 წელსაც კი საკმაოდ სოლიდურად გამოიყურება. ინტერიერიც შესაბამისი აქვს - ანატომიური ტყავის სავარძლები და ცენტრში განთავსებული მაჩვენებელთა დაფა, ინდივიდუალობას ხაზს უსვამს.

ამ ავტომობილის უნიკალურობა იმაში მდგომარეობს, რომ იგი მსოფლიოში ერთადერთია. თავდაპირველად იგი ვერცხლისფერი იყო, მას შემდეგ არაერთხელ შეიცვალა ფერი, თუმცა დღევანდელი მონაცემებით ის კვლავ ვერცხლისფერია.