აშშ-ის ბაზარზე მეორადი ავტომობილების საშუალო ფასმა 2023 წლის ზაფხულის შემდეგ უმაღლეს ნიშნულს მიაღწია

მეორადი ავტომობილების ბაზარზე ფასების ზრდის ტენდენცია გრძელდება — მიუხედავად გეოპოლიტიკური დაძაბულობისა, საწვავზე მაღალი ფასებისა და ირანში მიმდინარე ომისა, მოთხოვნა მეორად მანქანებზე სტაბილურად მაღალი რჩება.

Cox Automotive-ის მონაცემებით, გასულ თვეში შეერთებულ შტატებში მეორადი ავტომობილების საბითუმო ფასები 6.2%-ით გაიზარდა გასული წლის ანალოგიურ პერიოდთან შედარებით. ეს 2023 წლის ზაფხულის შემდეგ დაფიქსირებული ყველაზე მაღალი მაჩვენებელია.

„ჩვენ ვვარაუდობდით, რომ ახლო აღმოსავლეთის კონფლიქტი ბაზარზე გავლენას მოახდენდა, თუმცა მონაცემები საპირისპიროს ამტკიცებს — მოთხოვნა ჯანსაღია, მარაგები კი საკმაოდ მწირი“ — აღნიშნავს Cox Automotive-ის მთავარი ეკონომისტი, ჯერემი რობი.

აღნიშნული ტენდენციის განმაპირობებელი მთავარი მიზეზი ახალი ავტომობილების ფასია. თებერვლის მონაცემებით, მეორადი ავტომობილის საშუალო ფასი აშშ-ში 25 287$-ს შეადგენს, მაშინ როცა ახალი მანქანის საშუალო ღირებულება 49 100$-ია. ფასებს შორის ეს თითქმის ორმაგი სხვაობა მომხმარებელს აიძულებს, არჩევანი მეორად მოდელებზე შეაჩეროს.

პარალელურად, ახალი ავტომობილების გაყიდვების კლება იწვევს ე.წ. „Trade-in“ მოცულობების შემცირებას, რაც თავის მხრივ კიდევ უფრო ზღუდავს მეორადი მანქანების მიწოდებას ბაზარზე. მოლოდინზე მაღალი მოთხოვნის გამო, Cox Automotive-მა მეორადი ავტომობილების გაყიდვების პროგნოზი 20.4 მილიონ ერთეულამდე გაზარდა. მიუხედავად ამისა, წლის მეორე ნახევარში მოსალოდნელია გაყიდვების ტემპის შენელება. ჯამში, არსებული პროგნოზებით, 2026 წელს მეორადი ავტომობილების ბაზარი 2025 წელთან შედარებით დაახლოებით 1%-ით შემცირდება.

რაც შეეხება ახალი ავტომობილების ბაზარს, აშშ-ში წელს დაახლოებით 15.8 მილიონი ერთეულის გაყიდვაა მოსალოდნელი. ფაქტია, რომ სანამ ახალი მანქანები ფუფუნების საგნად რჩება, მეორადი ბაზარი აქტუალობას არ დაკარგავს, მიუხედავად მზარდი ფასებისა.