ჩინური ელექტრიფიცირებული მანქანების გაყიდვები 13%-ით შემცირდა და მსოფლიო ამას მალე იგრძნობს
მიუხედავად იმისა, რომ ჩინეთი კვლავ რჩება ახალი ელექტრომობილების მსოფლიოს უმსხვილეს ბაზრად, ქვეყნის შიგნით გაყიდვების მაჩვენებელი მაინც ჩამორჩება მის ძველ რეკორდულ ნიშნულს. ბაზარზე არსებული ეს სტაგნაცია ადგილობრივ ავტომწარმოებლებს აიძულებს, ორმაგი ძალისხმევით იმუშაონ თავიანთი ახალი მოდელების საზღვარგარეთ ექსპორტზე გატანაზე.
ასევე იხილეთ: როგორ იგებს ჩინეთი ელექტრომობილების ომს?
ჩინეთის სამგზავრო ავტომობილების ასოციაციის პირველადი მონაცემები აჩვენებს, რომ ივნისში ქვეყნის მასშტაბით 1.04 მილიონი სრულიად ელექტრო და დამუხტვადი ჰიბრიდული ავტომობილი გაიყიდა. ეს ციფრი ერთი შეხედვით სოლიდურად გამოიყურება, თუმცა გასულ წელთან შედარებით ივნისის გაყიდვები 7 პროცენტით ნაკლებია. წლის პირველი ნახევრის მონაცემები კი კიდევ უფრო არასახარბიელოა – 2026 წლის განვლილ პერიოდში რეალიზაციის მაჩვენებელი 13 პროცენტით დაეცა და 4.73 მილიონი ერთეული შეადგინა.
მოთხოვნის ასეთ კლებას რამდენიმე ფაქტორი განაპირობებს: ჩინეთის ეკონომიკა კვლავ არასტაბილურია, მყიდველების დიდი ნაწილი ფასების კიდევ უფრო მეტად შემცირებას ელოდება, ხოლო ახალი ენერგიის მქონე ავტომობილების სახელმწიფო მხარდაჭერა და სუბსიდიები სულ უფრო მცირდება. როგორც გამოცემა South China Morning Post იტყობინება, პეკინმა მიმდინარე წლის დასაწყისში შეცვალა სუბსიდირების პოლიტიკა და დაიწყო ელექტრომობილების მწარმოებლებისთვის საგადასახადო შეღავათების ეტაპობრივი გაუქმება.
ამასთანავე, ცოტა ხნის წინ ოფიციალურად დადასტურდა, რომ ყოველწლიური სატრანსპორტო საგადასახადო შეღავათები, რომლებიც ვრცელდებოდა ელექტრომობილებზე, დამუხტვად ჰიბრიდებზე, გაზრდილი სვლის მარაგის მქონე მოდელებსა და წყალბადზე მომუშავე კომერციულ ტრანსპორტზე, 2027 წლის 1 იანვრიდან კიდევ უფრო შემცირდება. მართალია, ეს საგადასახადო შეღავათები ისედაც მცირე იყო და მომხმარებელს წელიწადში საშუალოდ 360-დან 660 იუანამდე (დაახლოებით 53-დან 97 დოლარამდე) უზოგავდა, თუმცა ამ გადაწყვეტილებამ ბაზარზე მაინც თავისი გავლენა იქონია.
ასეთ პირობებში, ჩინურ ბრენდებს შორის ამჟამად მხოლოდ BYD, Xiaomi და Leapmotor არიან ის კომპანიები, რომლებსაც ავტომობილების წარმოება რეალურ მოგებას უტოვებს. სააგენტო AlixPartners-ის პროგნოზით, 2030 წლისთვის შესაძლოა მხოლოდ კიდევ ოთხმა კომპანიამ მიაღწიოს იმ ნიშნულს, რომ ხარჯები სრულად დაფაროს, ხოლო ბევრი შედარებით სუსტი ფირმა უბრალოდ გაკოტრდება ან მსხვილი ბრენდების მფლობელობაში გადავა.
ვინაიდან შიდა ბაზარზე მოგების ნახვა სულ უფრო რთულდება, საავტომობილო კომპანიები მაქსიმალურად ფოკუსირდებიან საგარეო ბაზრებზე. ანალიტიკოსების ვარაუდით, ჩინურმა ბრენდებმა 2026 წლის ბოლომდე შესაძლოა ჯამში 10 მილიონამდე ავტომობილის ექსპორტი განახორციელონ, რაც წინა წელთან შედარებით სერიოზული, 41 პროცენტიანი ნახტომი იქნება.
