Infiniti-ს მძღოლს დრიფტი არ გამოუვიდა და Honda CR-V ამოაყირავა
ბოლო 30 წელიწადში ავტომობილი ბევრად უფრო უსაფრთხო ტრანსპორტი გახდა, თუმცა ჩვენ კვლავ ველოდებით ერთ კონკრეტულ ფუნქციას, რომელიც უამრავ უდანაშაულო ადამიანს მძიმე ავარიებში მოხვედრას თავიდან აარიდებდა. ეს არის ნავიგაციის სისტემა, რომელიც მძღოლებს ავტოენთუზიასტების შეკრებების გვერდის ავლით წაიყვანდა — ზუსტად ისეთი შეკრების, რომლის გამოც ტეხასის ერთ-ერთ გზაზე Honda CR-V რამდენჯერმე გადაბრუნდა.
View this post on Instagram
შემთხვევა გასულ თვეში, ტომბოლის მახლობლად მოხდა და ყველაფერი მას შემდეგ დაიწყო, რაც Infiniti G50-ის მძღოლმა გასასვლელთან შეკრებილი ხალხის წინაშე სცადა იმის დამტკიცება, თუ რამდენად კარგად შეეძლო თავისი უკანა წამყვანი ავტომობილის კონტროლი. ერთადერთი პრობლემა ის იყო, რომ მანქანის მართვა მან საერთოდ ვერ შეძლო.
მძღოლი გზაჯვარედინიდან გამოვარდა ოთხზოლიან გზაზე და მანამ, სანამ საჭეს გაასწორებდა, გაზის პედალს ფეხი მკვეთრად აუშვა. წონის ასეთმა მოულოდნელმა გადანაწილებამ ვერცხლისფერი G50 მკვეთრად მარცხნივ, ანუ საპირისპირო მოძრაობის ზოლებისკენ გაისროლა.
საპირისპირო მიმართულებით კი Honda CR-V მშვიდად მოდიოდა და მის მძღოლს წარმოდგენა არ ჰქონდა, რა ელოდა. ინფინიტის წინა ნაწილი საკმაოდ დიდი სიჩქარით მოძრავი შინდისფერი ჰონდას უკანა მხარეს შეასკდა, რის გამოც ქროსოვერმა ჯერ გვერდულად დაიწყო სრიალი, შემდეგ ამოყირავდა, წინა ბამპერზე ვერტიკალურადაც კი დადგა და საბოლოოდ გზის პირას, თხრილში ჩავარდა.
სანამ ეს ყველაფერი ხდებოდა, ინფინიტის ერთ-ერთი საბურავი, რომელიც შეჯახებისას ძარას მოწყდა, CR-V-ის უკან მიმავალ კიდევ ერთ სედანს დაეჯახა, რის შემდეგაც გზაზე დიდი სიჩქარით გაგორდა და ვიდეოს კადრებიდან გაუჩინარდა. სრულიად შესაძლებელია, რომ ამ მოწყვეტილ საბურავს გზაზე კიდევ სხვა ვინმე დაეზიანებინა.
View this post on Instagram
ინტერნეტში ამ ავარიის ამსახველი მობილური ტელეფონით გადაღებული მინიმუმ ორი სხვადასხვა რაკურსის ვიდეო ვრცელდება. ერთ-ერთ მათგანში ჩანს, როგორ მირბის ინფინიტის მძღოლი თავისი დამტვრეული სედანიდან ჰონდასკენ, რათა შეამოწმოს, კარგად არიან თუ არა იქ მყოფი ადამიანები. საბედნიეროდ, შემთხვევის ადგილიდან მიღებული ინფორმაციით, ავარიას მსხვერპლი არ მოჰყოლია.
