ბრუნეის სულთნის McLaren F1, ჰამილტონის ხელმოწერით, ახალი რეკორდისთვის ემზადება

ბრუნეის სულთნის კოლექცია, რომლის ფოტოები და ვიდეოებიც ინტერნეტში ძალიან იშვიათად თუ ვრცელდება, ჩვენს ყურადღებას ყოველთვის იპყრობს. ამჟამად კი, ჩვენი ინტერესის ობიექტი სამეფო ისტორიის სუპერქარი McLaren F1-ია, რომელიც $21 მილიონზე მაღალი შეფასებით, შესაძლოა ერთ-ერთი ყველაზე ძვირადღირებული F1 გახდეს, რომელიც ოდესმე აუქციონზე გაყიდულა.

ბრუნეის სულთნის ყოფილი სუპერქარი 1997 წელსაა წარმოებული და მასზე, Formula 1-ის შვიდგზის ჩემპიონის, ლუის ჰამილტონის ხელმოწერაა დატანილი. McLaren-მა ამ მოდელის საგზაოდ განკუთვნილი ვერსიის მხოლოდ 64 ეგზემპლარი შექმნა, ეს კონკრეტული ავტომობილი კი, შასის ნომრით 014 გახლავთ. ქარხნულად ის ტიტანის ყვითელ ფერში იყო შეღებილი, შავი ტყავისა და ალკანტარას ინტერიერით.

საინტერესოა, რომ სხვა მოდელებისგან განსხვავებით, რომლებიც სულთნის ავტოფარეხში ათეულობით წლებს ატარებენ, ამ McLaren-ის შემთხვევაში ასე არ მოხდა. ის ჯერ გაერთიანებულ სამეფოში გაიყიდა, შემდეგ კი თავად McLaren Cars-ის ყოფილმა დირექტორმა, დევიდ კლარკმა შეიძინა.

2006 წელს, ავტომობილი რესტავრაციისთვის McLaren-ის შტაბ-ბინაში დააბრუნეს. სწორედ აქ გადაღებეს ამჟამინდელ Ibis White ფერში და ძლიერი დატვირთვისთვის უიშვიათესი ნაკრებითაც აღჭურვეს - მათ შორისაა, დიდი ზომის ფიქსირებული უკანა ფრთა, F1 GTR-ისგან ინსპირირებული წინა ბამპერი და ა.შ. მსგავსი კონფიგურაციით, მსოფლიოში მხოლოდ 8 ეგზემპლარი აეწყო, რაც ამ მოდელს კიდევ უფრო ექსკლუზიურს ხდის.

განახლებები ამით არ დასრულებულა. გაუმჯობესებული გამონაბოლქვი სისტემა, OZ Racing-ის დისკები და LM-ს სპეციფიკაციის ინტერიერი ნახევარ მილიონ აშშ დოლარზე მეტი დაჯდა. მის მიმზიდველობას კიდევ უფრო აძლიერებს ლუის ჰამილტონის ხელმოწერა, რომელიც სპორტქარზე 2007 წლის F1-ის სეზონის შემდეგაა დატანილი.

ცნობისთვის, სუპერქარს მხოლოდ 22 000 კილომეტრი აქვს გავლილი და შესანიშნავ მდგომარეობაშია. ავტომობილი იმავე კოლექციის Gordon Murray T.50-თან ერთად იყიდება.