Mercedes-ი აალების საფრთხის გამო ათასობით ელექტრომობილს უკან გაიწვევს

Mercedes-Benz-ი აკუმულატორის პრობლემების გამო ამერიკის შეერთებულ შტატებში 11 000-ზე მეტ ავტომობილს უკან გაიწვევს. ამის შესახებ ეროვნული საგზაო მოძრაობის უსაფრთხოების ადმინისტრაციის (NHTSA) ანგარიშიდან ვიგებთ. ადმინისტრაცია მომხმარებლებს მოუწოდებს, ის ავტომობილები, რომლებიც უკან გაწვევის სიაში არიან, ხანძრის საფრთხის გამო შენობებს გარეთ და მოშორებით გააჩერონ.

NHTSA-ს მიერ 11 თებერვალს გამოქვეყნებული ანგარიშის თანახმად, უკან გაწვეული ავტომობილების ნაწილს „ნაკლებად გამძლე“ აკუმულატორის ელემენტები აქვს, რომლებიც ავტომობილის მაღალი ძაბვის ლითიუმ-იონური აკუმულატორისთვის შეუსაბამოა და, შესაბამისად, დატვირთვასაც ვერ უძლებენ. ანგარიშის მიხედვით, დეფექტი, სავარაუდოდ, წარმოების დროს დაშვებული შეცდომითაა გამოწვეული.

შედეგად, ეს აკუმულატორები მოკლე ჩართვის რისკის მატარებლები არიან, რამაც შესაძლოა „თერმული მოვლენა“ და ავტომობილის აალება გამოიწვიოს. NHTSA-ს განცხადებით, მანქანას მართვის ან პარკირების დროსაც კი შესაძლოა ხანძარი გაუჩნდეს. „თერმული ინციდენტის“ შემთხვევაში მძღოლებისთვის ხელსაწყოთა პანელზე გამაფრთხილებელი ნიშანი გამოჩნდება, თუმცა ეს არ ხდება გაჩერებული მანქანების შემთხვევაში.

Mercedes-Benz-ი მომხმარებლებს, რომელთა ავტომობილებსაც უკან გაწვევა ეხებათ, სთხოვს, ავტორიზებულ დილერებს ეწვიონ და დამატებითი საფასურის გადახდის გარეშე ახალი აკუმულატორები მიიღონ. თუმცა, ზომების მიღებამდე რეკომენდაციებსაც გასცემს და მოუწოდებს, მათი ავტომობილები შენობებისგან მოშორებით გააჩერონ და მხოლოდ 80%-მდე დამუხტონ.