Leapmotor C10-ის სპეციალური გამოშვება უჩვეულოდ მძლავრი და Tesla Model Y-ზე იაფია

სტანდარტული Leapmotor C10 სრულად ელექტრო SUV-ია, რომელიც დიდად არაფრით გამოირჩევა — არც მართვის სასიამოვნო გამოცდილებით და არც დიდებული დიზაინით — მიუხედავად ამისა, მისი სისწრაფე მშვენიერია და ფასიც ძალიან ბიუჯეტური... 

ამჯერად, ჩინურმა ბრენდმა C10-ის ახალი ვერსია გამოუშვა, რომელსაც ნამდვილად შეუძლია, პრეტენზია მძღოლების აღფრთოვანებაზე ჰქონდეს. 

Leapmotor C10 AWD Sports+ Special Edition-ად ცნობილი მოდელი, რომელიც ბრენდმა ავსტრალიაში წარადგინა, ძალიან მძლავრია და ამის გათვალისწინებით, ფასი აბსურდულად დაბალია... სტანდარტული C10-ისგან განსხვავებით, რომელსაც ერთი 215-ცხენისძალიანი ელექტროძრავა აქვს და 320 ნიუტონს გამოიმუშავებს, AWD Sports+ ორი ელექტროძრავითაა აღჭურვილი — შესაბამისად, სიმძლავრე 590 ცხ.ძ-ს უტოლდება, ხოლო მაბრუნი მომენტი 760 ნიუტონს. 

შედარებისთვის, თავდაპირველი Lamborghini Huracan LP 610-4 დაახლოებით იდენტურ 602 ცხ.ძ-სა და 560 ნიუტონს გამოიმუშავებდა, ხოლო LP 580-2 572-ცხენისძალიანი იყო. Leapmotor-ის ცნობით, ბრენდის ახალ ფლაგმანს 100 კმ/სთ სიჩქარის განვითარება, სულ რაღაც, 4 წამში შეუძლია — ეს ძალიან შთამბეჭდავი შედეგია, თუმცა, ალბათ, დასახელებული რიცხვების გათვალისწინებით, უკეთეს შედეგს ველოდით. 

პერფორმანსზე არანაკლებ შთამბეჭდავია C10 AWD Sports+-ის ფასიც — ის 37 600$ ეღირება, სულ 7 000$-ით მეტი, ვიდრე სტანდარტული მოდელი. ეს ფაქტი სხვა ჩინურ ავტომწარმოებლებსაც უხერხულ ვითარებაში აყენებს: BYD Sealion 7 Performance-ი C10-ს პერფორმანსით ჩამოუვარდება და 7 000$-ით უფრო ძვირიც ღირს...

ავტომობილი 81.9 კვტ.სთ-იანი ბატარეებითაა აღჭურვილი და ერთი დამუხტვით 437 კილომეტრის გავლა შეუძლია... პრობლემას არც სწრაფი დამუხტვა წარმოადგენს — 30-დან 80%-მდე მუხტის მისაღებად, ავტომობილს სულ 22 წუთი სჭირდება... 

ერთი სიტყვით, ელექტრომობილების ჩინური მწარმოებლები უკვე აღარ ხუმრობენ და ადგილობრივი გიგანტების ჩრდილში ახალი გოლიათებიც იბადებიან...