Toyota McLaren-ის წინააღმდეგ | 30 წლის სპორტქარმა სუპერქარს ტოლი არ დაუდო

ეს ისტორიაა, რომელიც ყველანაირ ლოგიკას ეწინააღმდეგება — 30 წლის ბიუჯეტური იაპონური სპორტქარი თანამედროვე ბრიტანული სუპერქარის წინააღმდეგ. ერთ მხარეს 2018 წლის McLaren 570S დგას — ინჟინერიის მწვერვალი, ხოლო მეორე მხარეს — 1992 წელს გამოსული Toyota MR2, თუმცა ამ მანქანას იაპონური ავტომწარმოებლის მხოლოდ სახელი და კორპუსი შერჩა.

McLaren 570S 3.8-ლიტრიანი Twin-Turbo V8 ძრავითაა აღჭურვილი, რომელიც 740 ცხენის ძალას გამოიმუშავებს. ეს ავტომობილია, რომელიც თავიდანვე სისწრაფისთვის შეიქმნა — მსუბუქი, აეროდინამიკული და კლინიკურად ზუსტი.

თუმცა, Toyota MR2-ის კაპოტის ქვეშ ნამდვილი სიგიჟე იმალება. ორიგინალი ძრავის ნაცვლად, აქ Honda-ს K24 აგრეგატი დგას, რომელიც დაახლოებით 750 ცხენის ძალას გამოიმუშავებს. მიმდევრობითი გადაცემათა კოლოფი და მინიმალური წონა ამ ავტომობილს ნამდვილ ბომბად აქცევს.

დრაგ-რბოლამ აჩვენა, რომ სიმძლავრე ყველაფერი არ არის. მაკლარენი მშვიდი და ზუსტი სტარტით 60 მილს (დაახლოებით 100 კმ/სთ) სულ რაღაც 3.08 წამში ავითარებს. მან დრაგში გაიმარჯვა, რადგან MR2-ის მთელი სიმძლავრე სტარტზე ბორბლების ბუქსაობაში იხარჯებოდა. მიუხედავად იმისა, რომ იაპონური სპორტქარი სტარტზე შენელდა (3.36 წამი), ფინიშის ხაზთან მან 246კმ/სთ სიჩქარე განავითარა, რაც მაკლარენის მაჩვენებელზე, დაახლოებით, 17 კმ/სთ-ით მეტია. 

ნამდვილი სიურპრიზი მაშინ დატრიალდა, როცა რბოლა გაგორებულზე დაიწყო. აქ, სადაც სტარტზე მოჭიდების პრობლემა მოიხსნა, ჰონდას ძრავიანმა ტოიოტამ მაკლარენი უბრალოდ გააქრო. სამიდან ორ რბოლაში MR2-მა ბრიტანულ სუპერქარს სამი ავტომობილის სიგრძით გაასწრო.

ეს რბოლა არის მტკიცებულება იმისა, რომ ძველი იაპონური პლატფორმები და სწორი ენთუზიაზმი დღესაც საშიშია, თუმცა, მაკლარენის ტექნოლოგიური უპირატესობა სტარტზე მაინც გადამწყვეტი აღმოჩნდა.