Audi-მ 1940-იან წლებში დაკარგული რეკორდსმენი, ლეგენდარული Lucca აღადგინა

Audi-მ თავისი ისტორიის ერთ-ერთი ყველაზე იდუმალი და მძლავრი ფურცლის გაცოცხლება გადაწყვიტა. მიუხედავად იმისა, რომ R8-ის წარმოების დასრულებით ბრენდის ხაზში სუპერქარის ადგილი ცარიელი დარჩა, ეს სტატია მის მიმკვიდრეზე არ იქნება. Lucca არ არის უბრალო ავტომობილი — ის 1930-იანი წლების ლეგენდის რეინკარნაციაა, რომელიც ბენზინის ნაცვლად მეთანოლს „სვამს“ და ცეცხლს 6-ლიტრიანი V16 ძრავიდან აფრქვევს.

სახელის ისტორია

ავტომობილმა სახელი იტალიის ქალაქ ლუკას პატივსაცემად მიიღო. 1935 წლის თებერვალში, Audi-ს წინამორბედმა, Auto Union-მა, მსოფლიო რეკორდის დამყარება სწორედ ამ ქალაქთან ახლოს მდებარე გზაზე სცადა. მაშინ ლეგენდარულმა მრბოლელმა, ჰანს შტუკმა, ამ მანქანით 327 კმ/სთ სიჩქარე განავითარა, რაც იმ დროისთვის საჯარო გზებზე დაფიქსირებული აბსოლუტური რეკორდი იყო.

ორიგინალი Lucca მეორე მსოფლიო ომის დროს დაიკარგა — ზოგი ამბობს, რომ ის ნაწილებად დაშალეს, ზოგი კი მიიჩნევს, რომ საბჭოთა ჯარებმა გაიტანეს ომის ნადავლის სახით. ახალი Lucca კი თითქმის სამწლიანი მუშაობისა და მილიონობით დოლარის ღირებულების პროექტის შედეგია.

ნაცვლად ორიგინალი 5-ლიტრიანი აგრეგატისა, ახალ მოდელში 6-ლიტრიანი V16 დგას, რომელიც 520 ცხენის ძალას გამოიმუშავებს. ხელით ნაჭედი პანელები შეღებილია სპეციალურ „Cellulose Silver“ ფერში, რომელიც მაქსიმალურად იმეორებს 30-იანი წლების ტექსტურას.

მიუხედავად იმისა, რომ ავტომობილი სრულყოფილად აღადგინეს, ინჟინრებმა ერთი საიდუმლო მაინც ვერ ამოხსნეს — ისტორიაში არ შემორჩენილა არანაირი ნახაზი იმისა, თუ როგორ მაგრდებოდა საბრძოლო თვითმფრინავის სტილის მინის გადახურვა კორპუსზე მაღალ სიჩქარეზე. ამიტომ, Audi მაქსიმალური სიჩქარის გამოცდას არ გეგმავს — არსებობს საშიშროება, რომ Lucca-მ „სახურავი დაკარგოს“.

ცხადია, ეს ავტომობილი არ არის სერიული წარმოებისთვის — ის Audi-ს ისტორიის ნაწილია, რომელიც მხოლოდ განსაკუთრებულ ღონისძიებებზე გამოჩნდება.