JCB სიჩქარის მსოფლიო რეკორდის დამყარებას წყალბადის ძრავით აპირებს

ბრიტანული კომპანია JCB, რომელიც მსოფლიომ მძლავრი ექსკავატორებითა და ტრაქტორებით გაიცნო, ფიზიკის კანონების ომში გამოწვევას კიდევ ერთხელ აპირებს. ამჯერად საქმე არა მიწის თხრას, არამედ ახალი ავტომობილით სიჩქარის მსოფლიო რეკორდის დამყარებას ეხება — იხილეთ JCB Hydromax.

ასეთი ნაბიჯები JCB-სთვის უცხო არ არის. 20 წლის წინ მათმა Dieselmax-მა დიზელის ძრავით 563 კმ/სთ განავითარა, რაც დღემდე მოუხსნელი რეკორდია. ახლა კი კომპანიის მიზანი კიდევ უფრო ამბიციურია: მათ სურთ 400 მილი/სთ-იან (დაახლოებით 643 კმ/სთ) ნიშნულს გადააბიჯონ და ამისთვის სრულიად ახალ ტექნოლოგიას — წყალბადს იყენებენ.

ცხადია, განსაკუთრებულია ძრავის ტექნოლოგია — ბევრი თანამედროვე ეკო-მანქანისგან განსხვავებით, Hydromax-ი არ იყენებს სათბობ ელემენტებს. მის გულში წყალბადზე მომუშავე შიდა წვის ძრავა (H2-ICE) ფეთქავს. ეს ორი გიგანტური ტურბო-ოთხცილინდრიანი აგრეგატია, რომლებიც ჯამში 800-დან 1000 ცხენის ძალამდე გამოიმუშავებენ.

ავტომობილის აგებაზე რალის ლეგენდარული გუნდი Prodrive ზრუნავს, ხოლო ძრავების განვითარებაზე ცნობილი კომპანია Ricardo მუშაობს. საჭესთან ენდი გრინი დაჯდება — ადამიანი, რომელმაც 1997 წელს ხმოვანი ბარიერი ხმელეთზე პირველმა გადალახა Thrust SSC-ით. პროექტი ძალიან სწრაფი ტემპით ვითარდება. Hydromax პირველ სატესტო გაშვებებს დიდ ბრიტანეთში ამ ზაფხულს განახორციელებს, აგვისტოში კი რეკორდის დასამყარებლად ბონევილში გაიგზავნება.

მიუხედავად იმისა, რომ წყალბადზე მომუშავე შიდა წვის ძრავებით აქამდე რეკორდების დამყარება BMW-მ და ჯესი ჯეიმსმა სცადეს, მათი შედეგები 200 მილი/სთ-ს არ ასცილებია. JCB კი აპირებს დაამტკიცოს, რომ წყალბადი არა მხოლოდ ეკოლოგიური, არამედ წარმოუდგენლად სწრაფი საწვავიცაა.