Ferrari ახალ ეპოქას ოფიციალურად იწყებს | იტალიელებმა პირველი ელექტრომობილი წარადგინეს

მარანელო თავისი მრავალწლიანი ისტორიის ახალ, ელექტრიფიცირებულ ეპოქას იწყებს. იტალიელებმა დაპირებული ელექტროსპორტქარი Ferrari Luce წარადგინეს, რომელიც ავტომწარმოებლისთვის პირველი სრულად ელექტრიფიცირებული მოდელი გახლავთ. Ferrari-მ ეს მოდელი ჯერ კიდევ წლების წინ დააანონსა, თუმცა ოფიციალური დებიუტი მხოლოდ წელს, უფრო კონკრეტულად კი, 2026 წლის 25 მაისს, რომში შედგა.

ასევე დაგაინტერესებთ: როგორ შექმნა ერთმა მჭედელმა ბიჭმა Ferrari

როგორც იცით და აქამდეც არაერთხელ აღგვინიშნავს, სახელწოდება Luce, რომელიც Ferrari-მ თავისი პირველი სრულად ელექტრო მოდელისთვის შეარჩია, იტალიურად „სინათლეს“ ნიშნავს. ამ დრომდე იტალიური კომპანია მის შესახებ მხოლოდ მცირე დეტალებს გვიზიარებდა, მათ შორის სუპერქარის შესაძლო ინტერიერს, თუმცა ავტომობილის შესაძლებლობების შესახებ მხოლოდ ახლა გახდა ცნობილი.

Ferrari-ს ინფორმაციით, Luce მარანელოს ისტორიაში რიგით მეორე მოდელი იქნება Purosangue-ს შემდეგ, რომელსაც უკანა კარები ექნება. თუმცა, განსხვავებით Purosangue-სგან, რომელიც ატმოსფერული V12 ძრავით აღჭურვილი SUV გახლავთ, ელექტროსპორტქარი „გრანდ-ტურერის“ სახით იქნება წარმოდგენილი. Ferrari თავის სრულიად ახალ მოდელს ოთხი დამოუკიდებელი ელექტროძრავით აღჭურვავს, რომლებიც კომპანიის შიდა გუნდის მიერაა შემუშავებული. ოთხივე ელექტროძრავის კომბინირებული სიმძლავრე კი 986 ცხენის ძალას გადააჭარბებს.

Luce-ში მოთავსებულ ელექტროაგრეგატებს საჭირო ენერგიით 122 კვტ.სთ ტევადობის ბატარეების ბლოკი მოამარაგებს. WLTP-ის ციკლით, Ferrari-ს პირველი ელექტრომობილი ერთი სრული დამუხტვით 530 კილომეტრს დაფარავს. აქვე უნდა აღინიშნოს, რომ Ferrari-ს მფლობელებს ელექტრომობილის დამუხტვაზე ბევრი დროის დაკარგვა არ მოუწევთ, რადგან Luce-ს 350 კვტ-მდე სიმძლავრის დამუხტვის მხარდაჭერა ექნება.

ამ მონაცემებით, Luce 0-დან 100 კმ/სთ-მდე სიჩქარის განვითარებას მხოლოდ 2.5 წამში შეძლებს, ხოლო მაქსიმალურ სიჩქარეს 310 კმ/სთ-ს მიაღწევს. აქვე, როგორც მოსალოდნელი იყო, ეს იქნება ყველაზე მძიმე ავტომობილი, რომელიც კომპანიას ამ დრომდე შეუქმნია. Luce-ს წონა, სავარაუდოდ, 2 300 კილოგრამია, წონის გადანაწილება ღერძებს შორის კი — 47:53 პროპორციით დაცული.

ასევე იხილეთ: დიზაინის პოეზია — Ferrari-მ Luce-ს ინტერიერი წარადგინა

რაც შეეხება ფასს: Ferrari-ს პირველი ელექტრომობილის ფასი $586 000-დან დაიწყება, თუმცა კომპლექტაციის შესაბამისად მისი ღირებულებაც გაიზრდება. გაყიდვების დაწყებას კი, სავარაუდოდ, მიმდინარე წლის ოქტომბრიდან უნდა ველოდოთ.