შელბი, რომელიც რესტავრაციის შემდეგ ოქროს საბადო გახდება, აუქციონზე გამოჩნდა

ჟანგიანი, დამტვრეული და დანგრეული — ეს ნამდვილად არ არის ის სიტყვები, რომლებითაც ვინმე თავისი ავტომობილის აღწერას ისურვებდა, თუმცა ამ კონკრეტულ ეგზემპლარს სხვაგვარად ვერ მოიხსენიებ. მიუხედავად ასეთი სავალალო მდგომარეობისა, ეს ექსკლუზივი აუქციონზე, სავარაუდოდ, ნამდვილ ფურორს მოახდენს და კოლექციონერებს შორის დიდ ბრძოლას გამოიწვევს.

ასევე იხილეთ: როგორ შექმნა ღარიბმა ფერმერმა ბიჭმა „ფორდის“ იმპერია?

საუბარია 1968 წლის Shelby GT500KR Convertible-ზე — კაბრიოლეტზე, რომელსაც Mecum-ი მიმდინარე წლის 25 ივლისს აუქციონზე გამოიტანს. განცხადებაში არ არის მითითებული, თუ რამ მიიყვანა მანქანა ამ მდგომარეობამდე, თუმცა ვიზუალიდან ჩანს, რომ ის ათწლეულების წინ მძიმე ავარიაში მოჰყვა, რის შემდეგაც უბრალოდ სადღაც მიატოვეს.

დაზიანებული ექსტერიერი, თუმცა საოცრად შენახული სალონი

ავტომობილს წინა ნაწილი პრაქტიკულად სრულად განადგურებული აქვს: ბამპერი დეფორმირებულია, ცხაურა — გატეხილი. კორპუსს ქარხნული თეთრი შეფერილობა აქვს, ლურჯი სპორტული ზოლებითა და შავი ნაჭრის გადასახსნელი სახურავით. მანქანა კვლავ 15-დუიმიანი დისკებითა და Goodyear Eagle ST საბურავებითაა აღჭურვილი, თუმცა კარების გარშემო, საჰაეროებსა და ძარის ქვედა პანელებზე უზარმაზარი რაოდენობით ღრმა ჟანგია მოდებული.

კატასტროფული ექსტერიერის ფონზე, სალონის მდგომარეობა მოულოდნელი სიურპრიზია — ის საოცრად კარგ მდგომარეობაშია შენახული. თითქმის ხელუხლებელია შავი ვინილის სპორტული სავარძლები, კლასიკური სამქიმიანი საჭე და ხის დეკორაციები — ასევე, Philco-ს რადიო და ოდომეტრი, რომელიც 80 757 მილს (დაახლოებით 130 000 კმ) აჩვენებს.

რა ხდება კაპოტის ქვეშ?

ამ მანქანის მთავარი ღირებულება მის სიღრმეში იმალება. ის აღჭურვილია ლეგენდარული 7.0-ლიტრიანი Cobra Jet V8 ძრავით, რომელიც ქარხნულად 335 ცხენის ძალას გამომუშავებდა. აგრეგატი გადაბმულია 4-სიჩქარიან მექანიკურ გადაცემათა კოლოფთან Hurst-ის სპორტული ბერკეტით.

ქარხნულ მდგომარეობაში ეს კაბრიოლეტი 100კმ/სთ-მდე 6.9 წამში ჩქარდებოდა, მეოთხედ მილს კი 14.8 წამში ფარავდა — მისი მაქსიმალური სიჩქარე კი 225 კმ/სთ იყო. რა თქმა უნდა, ეს კონკრეტული ეგზემპლარი ამას უახლოეს მომავალში ვერ გაიმეორებს, თუმცა მას აქვს საჭის და მუხრუჭების ჰიდროგამაძლიერებელი და Traction-Lok უკანა დიფერენციალი.

Mecum-ს საწყისი სააუქციონო ფასი არ გამოუქვეყნებია, თუმცა მანქანა იყიდება რეზერვის გარეშე, რაც ნიშნავს, რომ ის ნებისმიერ ფასად გაიყიდება. 1968 წელს მისი ფასი სულ რაღაც $4 600 იყო (რაც ინფლაციის გათვალისწინებით დღეს დაახლოებით $45 000-ია), თუმცა ექსპერტები ვარაუდობენ, რომ საბოლოო ფასი ბევრად მაღალი იქნება.

მთავარი მიზეზი, რის გამოც მყიდველები სპორტქარის ამ ნაშთში კოლოსალურ თანხას გადაიხდიან, მისი ექსკლუზიურობაა — მსოფლიოში სულ 518 ერთეული Shelby GT500KR კაბრიოლეტი იქნა გამოშვებული. სრულად რესტავრირებული ასეთი მოდელების ფასი მეორად ბაზარზე ექვსნიშნა ციფრებს აღწევს, ამიტომ გამოცდილი კოლექციონერებისთვის ეს იდეალური ბაზისია გრძელვადიანი, საამაყო პროექტისთვის.