გარდაიცვალა BMW-სა და ავტოსპორტის ლეგენდა ჰერბერტ შნიცერი

BMW-ს ავტოსპორტის განყოფილებამ თავისი ისტორიის ერთ-ერთი ყველაზე გავლენიანი და მნიშვნელოვანი ფიგურა დაკარგა. 85 წლის ასაკში გარდაიცვალა ლეგენდარული გუნდის, Schnitzer Motorsport-ის თანადამფუძნებელი ჰერბერტ შნიცერი. მან ნახევარ საუკუნეზე მეტი შესწირა ბავარიული ბრენდის ერთ-ერთი ყველაზე წარმატებული და ტიტულოვანი სარბოლო იმპერიის შენებას.

ასევე იხილეთ: როგორ დაიპყრო M3-მა მსოფლიო (ნაწილი 1)

თავის ძმასთან, იოზეფთან ერთად, ჰერბერტმა Schnitzer Motorsport-ი ნამდვილ გიგანტად აქცია, რომელიც ტურინგის ჩემპიონატებში, გამძლეობის რბოლებში, DTM-სა და საერთაშორისო არენაზე BMW-ს ტრიუმფთან ავტომატურად ასოცირდებოდა. გუნდის ანგარიშზე უამრავი გამარჯვება და ტიტულია, თუმცა მათი საავტომობილო ევოლუციის მწვერვალი მაინც 1999 წელი აღმოჩნდა: BMW V12 LMR-მა, ბრენდს ლეგენდარულ ლე მანის 24 საათიან რბოლაში ისტორიული გამარჯვება მოუტანა.

ლეგენდარული ბეტმობილიდან — BMW 3.0 CSL-დან დაწყებული, საკულტო E30 M3-ითა და ლე მანის ტრიუმფატორი V12 LMR-ით დამთავრებული, ბავარიული სარბოლო მანქანების თაობებს მსოფლიოს გარშემო გამარჯვების კვარცხლბეკზე სწორედ შნიცერის სახელი მიჰყავდათ. აქტიური სპორტიდან ჩამოშორების შემდეგაც კი, ჰერბერტი რჩებოდა უდიდესი ავტორიტეტისა და პატივისცემის მქონე ფიგურად როგორც BMW Motorsport-ის შიგნით, ისე ავტოსპორტის ფანებში. ბევრი მას BMW-ს თანამედროვე სარბოლო მემკვიდრეობის მთავარ არქიტექტორად სამართლიანად მიიჩნევს. მისი წასვლა ერთი დიდი ეპოქის დასასრულია, თუმცა გუნდის გავლენა კიდევ ბევრ თაობას გაჰყვება.

თუკი არჩევანის გაკეთება მოგვიწევს, შნიცერის ეპოქალური მემკვიდრეობის საუკეთესო სიმბოლოდ ორი სრულიად განსხვავებული, მაგრამ თანაბრად გენიალური მანქანის დასახელება შეიძლება: ემოციური და კულტურული თვალსაზრისით BMW E30 M3 (Group A) — სწორედ შნიცერის გუნდმა შეძლო E30 M3-ის პოტენციალის მაქსიმუმამდე აყვანა და მასთან ერთად DTM-ის, WTCC-ისა და ETCC-ის ჩემპიონატების მოგება. ეს მოდელი საუკეთესოდ ასახავს ჰერბერტის ხედვას — აეღო სერიული ავტომობილი და მისგან ტრეკის დაუმარცხებელი იარაღი შეექმნა.

საინჟინრო ტრიუმფის თვალსაზრისით კი 1999 წლის BMW V12 LMR-თან ახლოს ვერაფერი მივა — ეს გუნდის საინჟინრო და ტაქტიკური სიმწიფის მწვერვალია. ლე მანის მოგება პროტოტიპების კლასში, სადაც კონკურენცია კოსმოსურ მასშტაბებს აღწევდა, იყო მომენტი, რომელმაც შნიცერის სახელი ავტოსპორტის ისტორიაში ოქროს ასოებით ჩაწერა.