ჰორმუზის კრიზისის პარალელურად, აშშ-ში საწვავი ისევ გაძვირდა

ახლო აღმოსავლეთში ვითარება კვლავ უკიდურესად დაიძაბა: ირანსა და შეერთებულ შტატებს შორის არსებული ფეთქებადსაშიში ზავი სრულმასშტაბიან სამხედრო დაპირისპირებაში გადაიზარდა. შედეგად, მსოფლიოს ერთ-ერთი უმთავრესი ენერგო-არტერია — ჰორმუზის სრუტე — ფაქტობრივად, კვლავ პარალიზებულია, ნავთობის საზღვაო გადაზიდვები კი თითქმის სრულად შეჩერდა.

გეოპოლიტიკურმა კრიზისმა მყისიერი დარტყმა მიაყენა ამერიკელ მძღოლებსა და საავტომობილო სექტორს. აშშ-ში საწვავის საშუალო ეროვნულმა ფასმა 1 გალონზე $4.00-ს მიაღწია.

ავტომოყვარულთა და მძღოლთა ასოციაციის (AAA) უახლესი მონაცემებით, საწვავი ყოველდღიურად ძვირდება — რეგულარის ტიპის ბენზინი დღეს $4.00 ღირს, მაშინ როცა სულ რაღაც ერთი კვირის წინ $3.87 ჯდებოდა, ერთი თვის წინ — $3.95, ხოლო 2025 წელს მძღოლები გალონში საშუალოდ $3.14-ს იხდიდნენ. რაც შეეხება დიზელს, აქ კიდევ უფრო მძიმე მდგომარეობაა, რაც სატვირთო და ლოგისტიკურ სექტორს დიდ ზიანს აყენებს — დიზელის საშუალო ფასი $5.11-მდე გაიზარდა (ერთ კვირაში +23 ცენტი, ხოლო შარშანდელთან შედარებით +$1.38).

რეგიონული კონტრასტები: $3.35-დან $6.70-მდე

როგორც მოსალოდნელი იყო, შტატებს შორის ფასების კოლოსალური აცდენაა — კალიფორნიის შტატის საშუალო მაჩვენებელი $5.50-ია, თუმცა ცალკეულ რეგიონებში, მაგალითად მონოს ოლქში (Mono County), 1 გალონ ბენზინში მძღოლებს $6.70-ის გადახდა უწევთ. სრულიად საპირისპირო სურათია ინდიანაში, სადაც საშუალო ფასი სულ რაღაც $3.35-ია, ხოლო ყველაზე ძვირიან ავტოგასამართ სადგურებზეც კი ტაბლოზე $3.50-ზე ნაკლები ციფრი წერია.

ნავთობბაზარზე არსებული პანიკა პირდაპირ უკავშირდება სპარსეთის ყურეში მიმდინარე მოვლენებს. ბოლო დღეებში ირანულმა ძალებმა იერიში მიიტანეს სავაჭრო გემებზე, მეზობელ ქვეყნებსა და რეგიონში განთავსებულ ამერიკულ სამხედრო ობიექტებზე.

საპასუხოდ, აშშ-ის ცენტრალურმა სარდლობამ ირანის სამხედრო ინფრასტრუქტურაზე ჰაერიდან ახალი მასშტაბური დარტყმები განახორციელა, რათა ჰორმუზის სრუტეში კომერციულ ნაოსნობაზე თავდასხმები აღკვეთოს. სამხედრო დაპირისპირებას უკვე მოჰყვა მსხვერპლი ამერიკელ ჯარისკაცებს შორისაც.

ექსპერტების პროგნოზით, თუ საომარი მოქმედებები უახლოეს დღეებში არ შეწყდა და სრუტეში ნავთობტანკერების უსაფრთხო გადაადგილება არ აღდგა, საწვავის ფასები მსოფლიო მასშტაბით ახალ რეკორდულ ნიშნულებს მიაღწევს.